Саха норуотун инники дьылҕатын быһаарыыга автономияны ылыныы суолтатын өйдөтүүгэ, бу историческай суолталаах хардыыны оҥоруу кэмигэр национальнай боппуруоһу кутталга угар утары туруу мэһэйдээбитэ.

Бу кэмҥэ «Манчаары» хаһыат олох-дьаһах сатарыйбытын аһаҕастык этэн туран, саха норуотугар государственнай былаас тэриллиитэ, өлүүттэн-сүтүүттэн, аччыктааһынтан-хоргуйууттан быыһаныыга суос-соҕотох суолунан автономнай республика буолуу быраабын ылыныы тириэрдиэхтээҕин үөрэҕэ суох киэҥ маассаҕа быһаарбыта, өйдөппүтэ. Түгэнинэн туһанан ытык киһибит Платон Алексеевич Ойуунускай Автономнай Республика буолар туһунан дьоҕус эрээри чиҥ-чаҥ тыллаах, соргулааҕы түстүүр баҕатын, санаатын эппит ыстатыйатын Республика күнүгэр анаан-минээн бэчээттиибит.
Бүтүн Арасыйа Киин Үрдүк Суута февраль ыйа уон ордуга алта күнүгэр саха омук сирин «Якутскай Автономнай Социалистическай Республика» буоллун диэн ууруу уурбут.
Онон үс сүүс сылы мэлдьи кэҥээн-уһаан үөскээбит хара баттал Арасыйа үлэһитин-бааһынайын күүһүнэн, кытаанах ыйааҕынан — алдьанна.
Саха сирин үлэһит норуотун күүстээх көҥүлэ, өйдөөх санаата хараҥа хаайыыттан быыһанна, дьоллоох-соргулаах үтүө олоҕу оҥорорго суола аһылынна, тэҥ быраабын тутарга тилиннэ.
Саха сирин үтүөтэ-үөрэхтээҕэ, үлэһит норуота кичэйэн-хачайан үлэлиэх тустаахтар, төрөөбүт сирдэригэр, саха норуотугар сырдыгы аһан, олоҕу үрдэтэн соро-муҥа суох үтүө олоҕу туругурдуох тустаахтар.
Күүстээх үлэ кыһатыттан-уотуттан саха норуотун кэрэ тыллааҕа, талааннааҕа үөскээн, үөдүйэн иһиэхтэрэ.
Үөрүү-көтүү соргутунан, талба-талаан ырыатынан сыстаҕас өйдөөх-санаалаах саха норуота үлэлээн тиҥийэн-таҥыйан күөстүү оргутан үтүө сүдү олоҕу оҥоруохтара.
Иннибитигэр кэрэ кэскил, дьоллоох олох, атаҕастабылы-баттабылы аастыбыт! Бүгүҥҥү күммүт дьоллоох сырдыгын былыргы олох хара дьайдара бандиттар хараартылар.
Аны биирдэ тэбиэһирэн тэптэхпитинэ, биирдэ күүрэн оҕустахпытына былыргы олох хара дьайа халбарыйыаҕа, саҥа олоҕу үөрэ-көтө оҥорбутунан-туппутунан барыахпыт.
Саха норуотун хара дьайа халбарыйан, дьоло-соргута улааттын!


ОЙУУНУСКАЙ.


Кулун тутар 8 кµнэ,
1922 сыл.
«Манчаары» хаһыат
4-5 N-рэ.
"Саха сирэ" хаһыат.