Эт аһылыктар

Ойоҕос.  Өбүгэлэрбит күндү аһылыктара. Эмис сылгы ойоҕоһун сүрүҥүй соҕустук буһараллар уонна мас кытыйаҕа сойуталлар. Былыр эмис ойоҕоһунан мааны ыалдьыттары күндүлүүллэрэ.

Хаһа. Сылгы өрөҕөтүгэр үөскүүр сыата. Эмис сылгы хаһата кэпсэлгэ киирэр үтүө ас. Муҥутуур эмис сылгы хаһата суор солото буолар: биир тутуму кытта эрбэх устата (15 см кэриҥэ). Итинтэн уратытыгар хаһа тарбах халыҥынан кэмнэнэр: Ылгын чыкыйа, биир илии, үс илии, түөрт илии.

Өбүгэлэрбит хаһаны тоҥорон баран лэппиэскэни кытары сиикэйдии сииллэрин сөбүлүүллэрэ..  

Харта. Сылгы суон оһоҕоһо. Сыалаахминньигэс ас. Хартаны ыраастык сууйан, сыалаах өртүн иһигэр тиэрэн баран, харыҥы кытта холбуу буһараллар. Буспут хартаны иһиккэ хоторон сойуталлар уонна кыра гына кырбастыыллар, кырбыыллар.

Хаан. Сүөһү оһоҕоһугар хааны кутан бэлэмнэммит ас хааҥҥа ордук минньигэс буоллун диэн, сыаны кыбаан куталлар. Сылгы хааныгар сөп буоларынан хаары кутан баран, дэлби ытыйаллар. Өһөҕө сөҥмүтүн кэннэ, дагдайбыт ыраас хааны баһан ылаллар. Итинник бэлэмнэммит сылгы хаанын субай диэн ааттыыллар.

Ис үөрэтэ. Ынах иһин дэлби ыраастаан, сууйан баарн, бытархай гына кырбыыллар уонна буһараллар. Буһарын саҕана ньэчимиэн бурдугунан  сэлиэйдииллэр. 

Дыраһааҥка (холуодунай). Дыраһааҥканы ынах туйаҕыттан оҥороллор. Туйаҕы уокка куйахалаан баран, тириитэ маҥхайыар диэри быһах биитинэн кыһыйаллар. Ол кэнниттэн ыраас ууга дэлби сууйаллар. Туйах куйахатын, силгэтин быһаҕынан элийэн ылан, кыра гына кырбастыыллар. Ол кэнниттэн ыраас ууга дэлби сууйаллар, уҥуохтарын сүгэнэн үлтүрүтэллэр. 4-5 чаас устата оргуталлар. Туйах лаппа оргуйан уҥуохтарыттан араҕыстаҕына, муос ытыгынан дэлби ытыйаллар уонна сиидэлииллэр. ити кэнниттэн иһиккэ кутан сойуталлар.

Билигин буспутун кэннэ силгэлэриттэн арааран мясорубкаҕа эрийэллэр уонна миинигэр кутан сойуталлар.

Н.Е. Саввинов "Өбүгэлэрбит олохторо-дьаһахтара" Дьокуускай 1992