Тайах боллоруга (мунна)

Тайах боллоругун (муннун) арааран ылыллар уонна сууйан баран туустаах ууга буһарыллар. Үчүгэйдик буспутун кэнниттэн сылаастыы түүтүн элийэн быраҕаллар. Тайах боллоруга дьүһүнэ уонна амтана ынах сүөһү бүдүргэйигэр маарынныыр. Боллорук буспут миинин атынаска туһаныллыбат.

Тайах быара

Эмис, доруобай тайах быарын, син эмиэ сылгы быарын курдук. хас да ньыманан тоҥоруллар уонна аһылыкка тоҥнуу туһаныллар.

Тайах быысаһа

Хара тыа бу аарыма кыылын иһиттэн ордук күндүркэтэн быысаһын туһаналлар. Быысаһы үчүгэйдик ыраастыыллар уонна сууйан баран тиэрэллэр. Туустаах ууга буһаран баран остуолга аҕаларга, син эмиэ сүөһү хаанын биэрэр курдук , өлүүскэ-өлүүскэ эбэтэр чараас гына бысталаан бэриллэр.

Ассорти

Тайах этиттэн уонна иһиттэн остуолга ассорти бэлэмнииллэр. Улахан таас бүлүүдэҕэ тайах араас миэстэлэриттэн буһарыллыбыт эттэри ууруллар. Итинник боллоругу, сүрэҕи, быары, быысаһы холбооһун ассортины ордук киэргэтэр.