Ханнык баҕарар көтөрү өлөрөөт, тута үргээтэххэ үчүгэйдик ыраастаныллар. Ол эрээри сороҕор хас да хонноруллан баран үргэниллэр түбэлтэлэр көрсүллэллэр. Хас да хонук сыппыт көтөр түүтэ үчүгэйдик үргэммэт, төрдүнээҕи ньуолах түүтэ хаалар.

Үчүгэйдик оргуйбут ууга угаат, үргээтэххэ ханнык баҕарар көтөр түүтэ үчүгэйдик ыраастаныллар. Булуустан таһаарыллыбыт көтөрү оргуйбут ууга уган үргэниллэр. Үргэммит көтөрү иһин хайытыах иннинэ бурдугунан сотуллар. Ити кэнниттэн куурда ууруллар. Оччоҕуна хаалбыт бытархай ньаарсын түүлэрэ хороһон тахсаллар. Бытархай түүлэри анал тымтык оҥорон уматан кэриэрдэллэр. Билиҥҥи кэмҥэ көтөр бытархай түүтүн газовай билиитэҕэ кэриэрдэр ордук табыгастаах.

Көтөр иһин оруурга үөһүн тэспэт туһугар болҕомто ууруллуохтаах. Сүрэҕи уонна быары ороон ылан үчүгэйдик ыраастаныллар, аһылыкка туһаныллар. Үчүгэйдик ыраастаныллыбыт көтөрү буһарыах иннинэ тымныы ууга сууйуллар.

Тыа булдуттан куобах маассабай аһылык быһыытынан киэҥник туһаныллар. Куобаҕы кэлин атахтарыттан аҥнары быаҕа ыйаныллар, кэлин атахтарынис өртүттэн хайытан тириитин туһаҕа таһаарар гына сүлүллэр. Сүлүллүбүт куобаҕы төбөтүн быһан хаанын сүүрдэр наадатыгар иһин ороон баран анал тааска эбэтэр биэдэрэҕэ угуллар. Хаанын анал миискэҕэ сүүрдүллэр. Хаана сүүрэн бүппүтүн кэнниттэн тыҥатын, сүрэҕин, быарын ылыллар. Быарын орооһуҥҥа үөһү тэспэт туһугар болҕомто ууруллуохтаах.Куобах агдатыгар хаалбыт хаанын ньуосканан баһан эрдэ ылыллыбыт хааҥҥа холбуу кутуллар.

И.И. Тарбахов "Эн остуолун сахалыы астара". Якутскай - 1991.