Бу элбэх омукка тарҕаммыт уонна биһирэммит аһылык биир бастыҥ көрүҥэ. Дыраһааҥкыны үксүгэр ынах сүөһү туйаҕыттан оҥороллор. Туйаҕы уокка куйахалыыллар. Куйахалыыр кэмҥэ тирии кылбайан тахсыар диэри быһах биитинэн кыһыйаллар.

Үчүгэйдик куйахаламмыт туйаҕы ууга хонноро уураллар уонна саҥа ыраас ууга үчүгэйдик сууйаллар. Туйах тириитин, силгэтин быһаҕынан элийэн ылан бытархай гына кырбаныллар, уҥуохтарын сүгэнэн үлтүрүтүллэр.

Дыраһааҥка икки варианынан бэлэмнэниллэр. Бастакыта: дыраһааҥканы буһарарга бэлэмнэниллибит туйаҕы тымныы ууга кутан буһарыллар. Буһарыы 4-5 чаас устата барар. Оргуйар кэмигэр тахсыбыт күүгэнин баһыллар. Туйах үчүгэйдик оргуйан бустаҕына уҥуохтарыттан арахсар. Муос ытыгынан илдьи ытыйыллар уонна сиидэлэнэр. Сиидэлэммит убаҕас дыраһааҥкаҕа туус, чөчөгөй кутуллар, күөх луук, биэрэс, чеснок эбиллэр. Ити кэнниттэн ыраас иһиккэ кутан сойутуллар. Үчүгэйдик бэлэмнэниллибит дыраһааҥка быһаҕынан быһыллар гына кытаатар.

Дыраһааҥканы оҥоруу иккис ньыматыгар, туйаҕы күүстээх уокка буһарыллар, онтон уоту сыыйа мөлтөтүллэр. Манна эриэппэ луугу уонна икки - үс гына устатынан чараас гына аҥаарданыллыбыт моркуобу кураанах чугуун хобордооххо кэриэрдэн буһа турар дыраһааҥкаҕа эбиллэр. Ити эбтлтктэр дыраһааҥка амтанын уонна дьүһүнүн тупсараллар. Бу ньыманан дыраһааҥканы 5-6 чаас буһарыллар. Туйах этэ уҥуоҕуттан арахсыан эрэ иннинэ хоторон сойутуллар уонна уҥуохтарыттан, илдьирийбит тирии ордуктарыттан сиидэлэммит дыраһааҥкаҕа туйах этин арааран ылан кырбаан хос кутуллар. Туус, чеснок эбиллэр. Ити кэнниттэн оргута түһэн баран араас иһиттэргэ кутан сойутуллар. Маннык оҥоһуллубут дыраһааҥка кутуллубут этэ көстөр гына дьэҥкир буолар. Дыраһааҥканы кытары остуолга 3 бырыһыаннаах уксуус сурадаһынын уонна остолобуой хартыыһатын уурары умнуллуо суохтаах.

И.И.Тарбахов “Эн остуолун сахалыы астара”, “Якуткига”, 1991.