Сылгы ойоҕоһун буһарыы хас да көрүҥүнэн ыытыллар. Сылгы ойоҕоһун духовкаҕа буһарыыга уончалыы сантиметр уһуннаах гына эттэниллэр, тымныы уунан сууйуллар.

Маҥнай тууһунан сотуллар, онтон оҥоһуллубут остолобуой хартыыһанан таһын чараас гына сотоҕун. 25 быраһыаннаах сүөгэйгэ туустаан, биэрэстээн, сымыыттаан тиэстэ бэлэмнииллэр. Тиэстэ билиинэ тиэстэтинээҕэр хойуу, алаадьы тиэстэтинээҕэр убаҕас буолуохтаах. Итинник тиэстэнэн ойоҕоһу барытын сотоҕун уонна итии духовкаҕа чараас гына сыанан сотуллубут лиискэ уган буһара ууруллар. Духовка төһөнөн итии да ойоҕос буһуутун процеһа үчүгэйдик барар. Ойоҕос саһарчы буһан эрдэҕинэ бэйэтиттэн тахсыбыт сүмэһинин холбуйан ылан үрдүгэр кутан иһиллиэхтээх. Ити кэмҥэ духовка итиитэ мөлтөтүллүөхтээх. Буһуу процеһа бүппүтүн билэр наадаттан быһах уһугунан дьөлө анньыллар. Дьөлө аспыт сиргиттэн дьэҥкир сүмэһин таҕыстаҕына буһарыыны тохтотуллар. Буһарыллыбыт ойоҕоһу хаппахтаах көстөрүүҥкэҕэ хоторуллар уонна лиискэ тахсыбыт сүмэһини холбуйан ылан ойоҕоско бэйэтигэр кутан хаппахтаныллар. Ойоҕос сойбутун кэннэ улахан бүлүүдэҕэ сытыы быһаҕынан уҥуоҕа эттиин, тас сыалыын сөп түбэһэр гына быһыллар уонна бүлүүдэҕэ төгүрүччү, эбэтэр бүлүүдэ биир өттүгэр ууруллар.

Итинник бэлэмнэниллибит ойоҕоско уулаах отону, хаппыыста салатын эбии ууран бэриллэр. Туустаах огурсуну, эриэппэ луугу бэриллэр. Маннык рецебинэн бэриллэр: 1,2 килограмм сылгы ойоҕоһо, 10 грамм хартыыһа, туус. Тиэстэтин рецебэ маннык: ыстакаан 1/3 25 быраһыаннаах сүөгэй, сымыыт аҥара, туус, биэрэс, 10 грамм сыа - лииһи сотууга, 25 грамм бурдук.

И.И.Тарбахов “Эн остуолун сахалыы астара”, “Якуткига”, 1991.