Ыам ыйыгар - шашлык үгэнэ. Төһө да төрөөбүт аспыт буолбатар, саас кэлиитин шашлыгынан көрсөр буолбуппут ыраатта. Шашлык маринадка сыттаҕына эрэ сымнаҕас, ураты амтаннаах буолар. Маринады араастаан оҥоруохха сөп. Үксүн майонеһынан, кетчубунан сотон, уксуустаан буһараллар. Ол куртахха куһаҕаннык дьайар. Онон эти сымнатар эрээри буортута суох маринады оҥостун:

Лимоннаах маринад

Бу саамай чэпчэки оҥоһуулаах маринад. Сибиинньэ этин туустаан, тумалаан, лууктаан, оливковай арыылаан, лимон аҥаарын симэһинин кутан баран, икки чаас устата сытыара түһэбит. Лимон эти сымнатар.

Кивиттэн маринад

Киви эти сымнатар. Куурусса этигэр барсыбат. 1 киилэ эти туустаан, биэрэстээн баран, хас да чаас холодильникка сытыараҕыт. 30 мүнүүтэ иннинэ таһааран 2-3 илдьиритиллибит кивини эбэҕит. Эт олус кытаанах буоллаҕына 1 чаас сытыарыахха сөп.

Имбиирдээх маринад

Куурусса, сибиинньэ, ынах этигэр туттуохха сөп. 1 киилэ эккэ туус, биэрэс, 2 ньуоска соевай соус, 3 чеснок, имбиир 1 см уһуннаах кэрчигэ наада.

Маны таһынан маринады терияки соустан, чэйтэн, квастан, пиибэттэн, гаастаах минеральнай утахтан, суораттан о.д.а. оҥоруохха сөп. Өстүөкүлэ, керамика иһиттэргэ оҥорор ордук.

Ангелина Васильева. "Саха ыала" ("Саха сирэ" хаһыат дьиэ кэргэҥҥэ аналлаах сыһыарыыта) Ыам ыйын 12 күнэ