Хааһы элбэх углеводтаах буолан киһиэхэ күүс-уох биэрэр. Улахан киһиэхэ сууккаҕа ортотунан 1500-2000 ккал наада эбит буоллаҕына, аҥардас гречка хааһытын 300 г өлүүтэ 488 ккал, сэлиэһинэй хааһыта 405 ккал биэрэллэр, оттон эбиэс хааһыта төһө да 265 ккал эрэ биэрдэр, белога, углевода, арыыта, битэмиинэ, микроэлеменэ элбэҕинэн өрдөөҕүттэн биллэр.
Эбиэс хааһытын рецебэ
Атеросклерозка, быар, бүөр ыарыыларыгар:
1 ыстакаан эбиэс куруппатыгар 1 лиитэрэ оргуйбут ууну кутабыт, уу аҥаара хаалыар диэри оргутабыт. Сиидэлиибит. Эбии 2 ыстакаан ууну кутабыт, сүүрбэ мүнүүтэ оргутабыт. Күҥҥэ үстэ аһыах иннинэ иһэбит.
Хаан ыарыытыгар:
2 остолобуой ньуоска эриллибит эбиэс араскыытын 1 ыстакаан буоккаҕа буккуйабыт. 15 хонукка хараҥа сиргэ туруорабыт. Сиидэлиибит. 20-30 хааппыланы ылан кыра ууга суурайабыт. Күҥҥэ иккитэ, сарсыарда уонна киэһэ, аһыах иннинэ иһэбит.
"Чөл буолуу кистэлэҥнэрэ 2010" Халандаар.