Былыр сахалар эдэр хатыҥ чараас туоһун ыраастаан баран, кыптыыйынан кырыйан, кыралаан чугуун көһүйэҕэ кутан бытаан уокка булкуйа-булкуйа оргуталлара.
Үрдүгэр кыратык арыы эбэтэр сүөгэй эбэллэрэ. Туос ууллан хап хара дьүһүннээх, хойуу сүөгэй курдук буолуор дылы оргуталлара. Бу уһун унньуктаах үлэ 6-8 чаас кэриҥин ылара.
Сахалар былыр тирии араас ыарыытыгар, оспот бааска, кыһыылаах ымынахха, экземаҕа, псориазка,хатыҥ дьүөкэтин тутталлара, туос тыыларын, иһиттэрин ыаһыыллара уонна оҕо аймах ыас оҥостон ыстыыра. Ыас оҥостон ыстааһын тиис, миилэ, айах иһин ыарыыларын эмтиир, ыраастыыр уонна тииһи бөҕөргөтөр.
Дьүөкэт састаабыгар толуол, ксилол, сымала уонна да атын эттиктэр бааллар. Билигин дьүөкэти тирии ыарыыларын эмтииргэ киэҥник тутталлар. Дьүөкэт "вишневскай", "вилькинсон" диэн маастар састааптарыгар киирэр.
"Бэйэбит эмтэниэҕин" "Кыым" хаһыаттан. 03.05.2012 сыл. Автора суруллубатах.