Радикулитынан ыалдьааччыларга аналлаах эрчиллиилэр ситимнэрин биэрэбит.

• Эрчиллиилэри саҕалыырга дириҥник, биир тэҥник үөһэ, аллараа тыыныллар. Ити кэнниттэн көхсүнэн тиэрэ сытыллар, илиини, атаҕы чиккэччи тутуллар. Уллуҥаҕы кумуччу тутан баран бэрбээкэйи үөһэ-аллара хамсатыллар. Маннык хамсаныылары 4-8 төгүл хатыланар. Салгыы эрчиллиилэри эмиэ сытан эрэ оҥоһуллар.
• Төбөнү төҥкөтөн, сэҥийэни түөскэ сыһыарыллар итиэннэ эмиэ уруккутун курдук көннөрүллэр. 4-8 төгүл хатыланар.
• Уҥа атаҕы такыччы тутуллар, онтон эмискэ өрө тэбиллэр.Хаҥас атаҕы эмиэ итинник эрчийэллэр. Биирдии атахха 2-5 төгүл хатыланар.
• Уҥа атаҕы такыччы тутан баран илиинэн искэ сыһыары тардыллар. Хаҥас атаҕы үкчү итинник эрчийэллэр: эмиэ 2-4 төгүл. Атахтары тус-туспа эрчийбит кэннэ, аны икки атаҕы тэҥҥэ тутан эмиэ итинник быһыылаахтык хас да төгүл искэ сыһыары тардыллар.
• Умса сытыллар. Атахтары уочаратынан көнөтүк туппутунан өрө көтөҕө көтөҕө төттөрү түһэриллэр. 2-6 төгүл хатыланар. Ол кэннэ икки илиинэн кэтэхтэн тардыстан , сис биилин өрө көтөҕүллэр уонна итинник өр соҕус сытыллар.
• Түөрт атах буолан илиинэн тайанан туруллар. Ити туран уҥа атаҕы искэ тиийэ такатыллар, онтон кэннигэр өрө тэбиллэр. Хаҥас атаҕынан итини хатыланар. 2-4 төгүл оҥоһуллар.
• Эмиэ аттаан туруллар уонна өттүгү кэннин диэки көтөҕүллэр, онтон урукку балаһыанньаҕа төннөрүллэр. Эрчиллии итиэннэри сытан тыыныынан түмүктэнэр.

Эрчиллии кэмигэр хамсаныы биир тэҥ буолуохтаах. Хамсанар кэмҥэ ыарыы биллиэ суохтаах. Хос хатылааһыннары эбии элбэтэн иһэр үчүгэй. Бастакы нэдиэлэҕэ 1-2 төгүл. Онтон сыыйа эбэн хас биирдии эрчиллиини чуолкайдык, ыксаабакка толорон иһэргэ кыһаллыахтаах. Эрчиллэр кэмҥэ тыыны хаайар эбэтэр олус ыгыллан чаастатык тыынар табыллыбат. Барытын бэйэҕэ сөп түбэһиннэрэн оҥорор ордук.

Чөл буолуу кистэлэҥнэрэ. Халандаар - 2010