Инсульт уонна мэйии хаанын кэһиллиитэ - бу биир өйдөбүл буолар. Сүрэх уонна мэйии бэрт синньигэс тымырдарын устун өлбөт мэҥэ уутун курдук хааммыт сүүрүгүрэрин тухары сүрэх тэбэр, мэйии үлэлиир.

Хааны тохтоло суох сүүрдэ турар тымырдарга ханна эмэ бүөлэнии эбэтэр быһы барыы буолла да, мэйии ханнык эрэ клетката өлөн барар.

Инсульт икки төрүөттээх: тымырга хаан баттааһына уонна атеросклероз (тымыр сыанан бүрүллүүтэ). Тымыр ханан эрэ бүөлэнэн хааллаҕына ишемическэй инсульт дэнэр. Онтон мэйиини хаанынан хачыайдыыр тымыр быһа баран мэйии бүрүөһүнүгэр хаан халыйдаҕына, геморрагическай инсульт дэнэр. Ыарыһах уҥа өттө баралыыстаатаҕына саҥата кэһиллиэн сөп, хаҥас өттө буоллаҕына өй-санаа өттүнэн оҕустарыы ылар.

Инсульт бастакы сибикитэ: киһи төбөтө ыалдьар, мэйиитэ эргийэр, төбөтө куугунуур, тыас бар курдук буолар, сылааргыыр, тырыттар. Толкуйдуур дьоҕура бытаарар, умнуу-тэннии элбиир, туох да төрүөтэ суох илии, атах ыарыыр, утуйан хаалар, дыыгыныыр, тыл булдьуйан барар.

Инсультуурга хаан баттааһына үрдүүрэ, сүрэх ыарыылара, саахарнай диабет, уойуу, хамсаммакка олорон, сытан тахсыы, табах тардыы, арыгыны иһии уонна санаа араастаан оонньуура дьайыахтарын сөн.

Былыргы сахалар инсультаабыт киһини буорга көмөн тартаран эмтииллэрэ. Кэлин үтүөрүүтэ алҕыыллара, илбийэллэрэ. Бу ыарыыны эмтииргэ дөлүһүөнү, бэс субатын, харыйа отун тутталлара. Сүөһү өлөрөн, инчэҕэй тириигэ суулаан, ыарыыны оботтороллоро.

Чөл буолуу кистэлэҥнэрэ. Халандаар - 2010