Биһиги эбэлэрбит-эһэлэрбит лэппиэскэни сирэй оһоххо, саха ууһа оҥорбут анал тимиригэр сырайан буһараллара. Билигин лэппиэскэни судургутук электрическэй эбэтэр газовай духовкаҕа буһарыллар. 

Лэппиэскэни астааһын үгүс омуктарга тус-туспа ыытыллар. Биһиэнэ эмиэ онтон уратылаах. Бу аһылыгы бэлэмнээһиҥҥэ маннык рецеби туһаныллар:

• 1 ыстакаан сибиэһэй эбэтэр аһыйбыт үүт
• Ыстакаан аҥара буспут уу
• 0,01 грамм суода,
• Дьэҥкир кырыылаах 3 ыстакаан бурдук, итинтэн биирэ хара бурдук
• 100 грамм туус.

Үүтү, ууну, тууһу, уонна суоданы холбуу булкуйуллар. Ити кэннэ бурдугу кутан түргэн туттуунан тиэстэни мэһийиллэр. Анал дуоскаҕа эмиэ түргэн туттуунан тиэстэ кытаатан. илиигэ сыстыбат буолуор диэри мэһийиллэр. Мэһиллибит тиэстэни хаппахтаах иһиккэ 15 - 20 мүнүүтэ туруоруллар. Ити кэнниттэн 1,5 сантиметр халыҥнаах, 15 сантиметр диагоналаах лэппиэскэниоҥоһуллар уонна сирэй өртүнсүөгэйинэн эбэтэр үүтүнэн сотуллар. Ол кэнниттэн биилкэнэн дьөлүтэ анньан ойууланыллар.

Духовканы орто температуратыгар туруоруллар уонна итинник оҥоһуллубут, үскэ тиийэ лэппиэскэни тимир лиискэ биирдэ ууран буһарыллар. Буһарыы уһуна 20 - 25 мүнүүтэ барар. Буһарыллыбыт лэппиэскэни духовкаттан таһааран ойоҕоһунан туруору ууран сойутуллар. Остуолга аҕаларга тэриэлкэҕэ хас да лэппиэскэни өрөһөлүү ууруллар. Итинник дьоҕус гына буһарыллыбыт лэппиэскэни кырбаныллыбат. Лэппиэскэни кытары сүөгэйи ынах арыытын, күөрчэҕи, көбүөрү ууруллар. Духовка суох буоллаҕына, билиитэ оһоххо арыылаах хобордооххо лэппиэскэни эмиэ буһарыллар.

И.И. Тарбахов "Эн остуолун сахалыы астара". Якутскай - 1991.