Дьиҥнээх сахалар, ыйынан көрөн олорууну саҕалааҥ! Өбүгэ үгэһэ оннук. Ый быыһык кэмигэр: ыйа суох - ыйааҕа суох күннэргэ, ыраастанар, сынньанар, уоскулаҥ кэмнэргэ, ханнык да саҥа сэби-сэбиргэли булунуман, саҥа саҕалааһыны, урууну тэрийимэн, үбүлүөйү оҥоруман! Ый олох суох күннэригэр: ый сынньанар кэмин аймаабыттар, бэйэлэрэ айманаллар.
Уруу оҥорбуттар: - тапталлара төһө да күүстээҕин үрдүнэн, 1 сыл иһигэр 12 эрэйи-моһолу көрсөллөр, ол кэннэ үтүө олоххо тиийэллэр, эбэтэр ону тулуйбатахтар - арахсаллар! Ый арахсыбаты да, күүһүнэн араарар. (Холобур буолар түбэлтэ элбэх). Барар, уолар, кыччыыр ыйга: урууну тэрийдэхэ - үс сыл иһигэр арахсыы үөскүөн сөп, эбэтэр 9 эрэйи 3 сыл иһигэр туоруугун. ый барар кэмигэр тэрийбит үлэҥ, атыыласпыт атыыҥ - барыта 3 сылынан суох буолар - эстэр, сииктии симэлийэр, сүмэһиннии сүтэр (Банкрот буолар).
Туох баар - бары үчүгэйи, үөрүүнү-көтүүнү барытын ый саҕаланыытыгар түстээн, - саҥа ыйга оҥорун! - Уруу, үбүлүөй тэрийии, саҥа дьиэҕэ киирии, дьиэ акылаатын түһэрии, өр туттуллары, өр кэтиллэри - массыына, трактор атыылаһыыны, атыылааһыны, кэргэҥҥэр - сон, бэргэһэ, биһилэх бэлэхтээһини, саҥа дуогабар, былаан, бырайыак, маҕаһыын, үлэ тэрилтэтин тэрийиилэри тэнитин!
Ый саҕаланыытыгар саҕаламмыт, сааһыламмыт, саамыламмыт үлэлэр үйэлэрэ уһун, бөҕө-таҕа буолар. Онтон, толору ыйга ол саҕалаабыккын толорон биэр, түүн түннүк сабыытын аһаҕас хаалларын - толору ый ыраастыыр, торуму толорор. Ый түһүүтэ - толорор үлэлэргин бүтэр, бу - ситэрии кэмэ. ыйы утарбыттар уһаабаттар, утарыллаллар, умсаллар, үлэлэрэ-хамнастара сатарыйар, олохторо огдолуйар.
Сыыспыттар суһаллык ыраастаныҥ!
ХАРАТААЛА, Хамаҕатта, Нам. "Киин куорат" хаһыаттан. Тохсунньу 11 күнэ, 2007 сыл.