Дьэбдьэкиэйэп (кулун тутар 14 күнэ) саҕана күүскэ сылыйдаҕына, саас эрдэ кэлэр.

Көмнөх хаар олунньу ый ортотугар түстэҕинэ, тыаллаах, уута суох саас буолар.

Көмүрүөлээх хаартан уу кэлбэт. Сааскы хатааһын тыала супту  үрэн кэбиһэр.

Күһүн хаар түһэр кэмиттэн хойуутаатаҕына, кэлэр саас эрдэлиир.

Кыһын хаар көмнөҕө маска элбэх буоллаҕына, сааһыгар үрэхтэргэ, алаастарга уу элбэх буолар.

Саас эрдэ хараардаҕына уонна хара хапсыырдаатаҕына, хаартан ууну күүппэккин, үүнээйи тахсыыта бытаарар.

Саас халлаан уһуннук хатаатаҕына, тииҥ үөскээбэт дьыла кэлэр.

Сар элиэ кэллэҕинэ, хаар ууллар.

Сахсырҕа саас эрдэ тиллэн сааҕынаатаҕына, хаар эрдэ ууллар.

Халлаан ойуур үрдүнэн көҕөрөн көстөр буоллаҕына, сотору кэминэн ириэһин кэлэр.

Хаар чооруоһун үөрэ халыҥ буоллаҕына, хаардаах саас буолар.

Сосин Иннокентий Михайлович. Күн-дьыл билгэтэ. Дьокуускай: "Бичик" - 2010.