Бочугурас сылаас кэмҥэ харыйа лабаатыгар саһан утуйар.

Бөрөлөр дьон олорор сиригэр, дьиэ таһыгар чугаһыыллар уонна улуйаллар.

Буруо оһох турбатыттан халлааҥҥа көнөтүк тахсар

Киһи атаҕын тыаһа хаарга улаханнык хаачыгырыыр, дьон саҥата, ыт үрэрэ ыраахтан иһиллэр.

Киһи тыына сырдырҕыыр.

куоска атаҕын саланар, сирэйин суунар.

Куоска оһох үрдүгэр утуйа мээрик буолар.

Кутуйахтар уйаларын аанын күн көрөр сирин өттүгэр тутталлар.

Кыһын халлааҥҥа кубалаҥ былыттар көһүннэхтэринэ, халлаан сотору кэминэн тымныйар.

Дьиэ сыбаҕа тыаһыыр, дэлбэритэ барар.

Оҕо илиитин уокка сырайар.

Ойуурга мутукча тостор.

Оһох уота кытарар.

Саҥа үүммүт ый өргөһө туруору тахсар.

Сулустар түүн сытыытык чаҕылыһаллар.

Суордар икки-үс буолан ханыылаһан, итиэннэ үөһэнэн эргийэ көтөллөр.

Уот күүскэ таһырҕаан умайар.

Үргэл сулус чаҕылыйан көстөр.

Ыт түүрүллэн сытар, утуйа мээрик буолар.

Ахсынньыга тымныы, хаара суох буоллаҕына, бэс ыйыгар кураан буолар.

Ахсынньыга хаардаах уонна ичигэс ый буоллаҕына, бэс ыйыгар тымныйар.

Киирэн эрэр күн тула улахан үрүҥ төгүрүктэр, үрдүк остуолбалар, эбэтэр хас да  сымыйа күн баар буоллаҕына, халлаан салгыы тымныйар.

Кыһын саҥа ый туруору таҕыстаҕына - тымныы, кураан ый, сытыары таҕыстаҕына - былыттаах, хаардах ый.

Сайын устата үүммүт ииччэх талах кылгас буоллаҕына - кыһыныгар хаара чарас, уһун буоллаҕына - хаара халыҥ.

Салгын сатардаҕына - халлаан тымныйар.

Сулустар күһүн чаҕылхайдык дьиримниир буоллахтарына, тымныы, аҕыйах буоллахтарына, сылаас күн-дьыл буолар.

Сэбирдэх хойуутаан, бытааннык түстэҕинэ, кыһына тыаллаах, хаҕыс буолар. Тураах куолаһа чөллөркөй буоллаҕына, үчүгэй күн-дьыл тура түһүөҕэ.

Тииҥ аһылыгын үрдүк сиргэ хаһаанарбуоллаҕына, кыһын хаар халыҥ буолар.

Тымтык тыһыгырыы-тыһыгырыы умайар буоллаҕына, тымныы өссө да ааспат.

Тымтык умайарыгар хоруолаах буоллаҕына, тымныы улахан буолар.

Уот умайарыгар "көҕөрөр" буоллаҕына, тымныйар.

Хаар кыырпаҕа бытархай уонна сэдэх буоллаҕына, тымныы түһэр.

Халлааҥҥа сулустар элбэх, уонна чаҕылхайдык тыгар буоллахтарына, сотору тымныйар, оттон аҕыйах буоллахтарына, хаардаах, былыттаах күннэр кэлэллэр.

Харыйа туораахтара лабаа аллараа өттүгэр үүннэхтэринэ, кыһына эрдэлиир уонна тымныы буолар, оттон үөһээ өттүгэр үүммүт буоллахтарына, кыһыҥҥы тымныы хойуутаан түһэр.

Чолбон тымныыга умайар.

Чооруостар сарсыардааттан чыбыгыраһар буоллахтарына, түүнүн тымныйар.

Ый икки дьиэлэннэҕинэ,эбэтэр биир болоорхой дьиэлэннэҕинэ, тымныйар.

Сосин Иннокентий Михайлович. Күн-дьыл билгэтэ. Дьокуускай: "Бичик" - 2010.