• Кырдьыбат өр үйэлээх киһи бэлиэтэ: хаана - сиинэ үчүгэй араҕас, чэпчэки, куҥа-таһа үчүгэй.
• Түүлээх киһи, уһун астаах (баттахтаах) дьахтар дьоллоох буолаллар.
• Кыыс, дьахтар кэтэҕин ньирэй аһа хойуу буоллаҕына - үгүс оҕолоох буолар.
• Дьахтар баттаҕа эмискэ уһуура - эрдэ өлөрүгэр.

• Киһи кэтэҕин сиигэ улахан кэдэгэр буоллаҕына - өйдөөх, онтон чокоойу курдук буоллаҕына, кэтэҕин олоруута куһаҕан, өйө суох баҕайы буолсу дииллэр.
• Сүүһэ намыһах, баһа үөһэ үмүрүйэн, баттаҕа өрө үүнэр киһи акаары буолар.
• Тэрбэгэр хаастаах, үрдүк сүүстээх, үөрүнньэҥ хааннаах киһи - үтүө майгылаах.
• Убаҕас хаастаах киһи дьоло суох буолар.
• Кулгааҕын үөһээ төбөтө олус үөһээ киһи - мөлтөх буолар.
• Ап араҕаһынан арылыччы көрбүт олохтоох харахтаах, лоп курдук тыллаах - өстөөх киһи - үчүгэй киһи бэлиэтэ.
• Киһи хараҕын иччитэ кырата - өр үйэлээх буоларыгар.
• Акаары киһи бэлиэтэ - хараҕа иччитэ суох.
• Хараҕа албын - уоруйах буолар.
• Кубархай хоҥоруулаах киһи - кылгас үйэлээх буолар.
• Бөҕө тиистээх киһи уһун үйэлээх буолар.
• Бөҕө киһи моонньо сэтэлээх, суон, илиитэ кырыылаах.
• Кэтит түөстээх, дараҕар сарыннаах, кырыылаах харылаах киһи - күүстээх, бөҕө буолар.
• Саар тэгил уҥуохтаах сылбырҕа киһи - хапсаҕай, атаҕынан кытыгырас буолар.
• Үлэһит киһи ытыһа кэтит, халыҥ, тарбаҕа кылгас.
• Киһи ытыһа чараас буоллаҕына, дьоло суох, кылгас үйэлээх аатырар.
• Ытыһа бүтэй дьахтар - дьоллоох, ытыһа тэһэҕэс - дьоло суох.
• Киһи тарбахтарын сүрэхтэрэ аһаҕас саастаах буолаллара - киһи дьоло суох буоларыгар.
• Уус киһи тарбахтара кэдэгэр уһуктаах буолар.
• Киһи харытын бобо тутан баран ньиккирийдэххэ, тымыра аһаҕас буоллаҕына - ол киһи оҕоҕо-сүөһүгэ дьоло суох; хаҥас илии - оҕо дьоло, уҥа илии - сүөһү дьоло.
• Маадьаҕар атахтаах киһи тирэхтээх, күүстээх, кытыгырас буолар.
• Тобуга кыпчыгыр киһи мөлтөх, сүһүөҕэ суох.
• Мэҥ - айыыһыт уурбут бэлиэтэ, онон мэҥнээх киһи дьоллоох.

Р.И.Бравина "Киһи уонна дьылҕа" 2002.