Бу кыыл бэйэтигэр сөрү - сөп эттээх - сииннээх, үрдүк атахтаах, хойуу, көп түүлээх кутуруктаах. Төбөтө улахан, хараҕа күөхтүҥү уоттаах, кулгааҕа сэбирдэххэ маарынныыр, уһуктаах, моонньо суон, түөһэ киэҥ. Өҥө сырдык бороҥтон ыла саһархайдыҥы, арҕаһа хараҥатыҥы, өрөҕөтө сырдык.
Саха сиригэр бөрө икки көрүҥэ баар: ойуур бөрөтө, туундара бөрөтө. Атыыр уонна тыһы бөрөлөр үкчүлэр эрээри, атыыра бөдөҥ-садаҥ. Атыыр бөрө уһуна 105-146 см, ыйааһына 40-50 кг, оттон тыһы бөрө 97-136 см, ыйааһына 25-36 кг. Бөрө Саха сиригэр бүтүннүүтүгэр баар. Чопчу биир сиргэ олохсуйбат. Кини аһылыгын батыһар. Бөрө төрүүр-ууһуур кэмиттэн ураты кэмҥэ дьиэ кэргэнинэн, үөрүнэн сылдьар. Кинилэр түүн улуйаннар ханна баалларын, тугу бултуохтаахтарын, нууччалыы эттэххэ информацияларын биллэрсэллэр. Бөрөлөр кыһынын үс-түөрт көс радиустаах сиринэн олохсуйаллар. Биир чааска 60 биэрэстэни барыахтарын сөп. 15-20 сыл олороллор. Бөрөнү атаҕа аһатар. Айылҕа оннук айдаҕа.
Саха ыалын халандаара - 2012