Биир күһүөрү сайын табаарыстарбыт отторун мунньа Чаат диэн күөл кытыытыгар кэллибит. Күһүҥҥү кус өссө да көҥүллэнэ илик, онон саа ылбатахпыт, күөл кытыыта мастаах, ураҕастаах буолан, илими үттэрбэт, ол иһин илиммит эмиэ суох.

Мунньар оппут дуона суох иэннээх, күөлү кыйа барар сир оҕотугар баар эбит. Илин диэки өттүгэр чараас тыалаах, ол тыаны ыйдаҥардан киэҥ уу көстөр. Улахан үрэх быһыылаах.
Биһиги, омун дьон, түргэн бэйэлээхтик сирбитин харбыы охсон куурбут-хаппыт от субууларын бэлэмнии оҕустубут. Биир сиргэ таба олорбот табаарыһым, дьахталлар бугуллуохтарыгар диэри, аны күһүн оһоххо оттуллуохтаах куруҥ маһы көрө барда. Мин кыраабылбын санныбар быраҕан тыа саҕатыгар хаалларбыт малларбытыгар бардым. Ол гынан. кутаа уматаары, чаанньык өрөөрү хаппыт мас көрдүү сэндэҥэ ойуурга киирдим. Күөл уонна үрэх ып ыраас уулаах, киһини сототунан дириҥнээх сип синньигэс от үрүйэнэн силбиһэллэр эбит. Мин сылбах үрдүгэр олорон "Родопи" табахпын тардыах буолбутум, арай, үрүйэ устун хара эриэн үөннэр кыймаҥнаһан устан эрэллэр эбит ээ. Соһуйдум аҕай, араас санаа да киирэн ылла. Сэппэрээк, ыарҕа саба үүммүт буолан, үрүйэм сороҕо эрэ көстөр. Сэрэнэн тураммын мутуктаах мастанан аргыый аҕай чугаһаатым. Онно көрбүтүм, кылбай балыктар үрүйэ чычаас сиригэр хара көҕүстэрэ эрэ көстөн, имиллэҥнээн устан ахай эрэллэр эбит. Мин оччону көрөн баран туруом дуо, араас силистээх-мутуктаах мастары аҕалан, ууга быраҕан быһыткурдугу оҥордум, сүүрэн тиийэн кыраабылбын аҕаллым. Хаайтарыыга устан кэлбит кылбардары бытааралларын саҕана кыраабылбынан тарыйан отон угугар элитэн истим. Чаас аҥара туран (салгыы кэлбэтэхтэрэ) куул аҥара балыктанным. Онон кыраабылынан балыктаан турардаахпын.

Петр Николаев. "Кыым" хаһыат 2012 сыл кулуне тутар 1 күнэ.