Бу түбэлтэ ааспыт үйэ ортотун диэки буолбут. Настаа урут холкуос бастыҥ сүөсүһүтэ этэ. Аҕа дойду улуу сэриитэ буолуо биир сыл иннинэ биригэдьиир Сүөдэрдиин ыал буолбуттар. Сүөдэр бастакы хомуурга  барбыт. Балтараа сыл устата тыыннааҕын биллэрэн син суруйар эбит. Сэрии иккис сылын бүтүүтэ "хара сурук" кэлбит.

Настаа сэрии бүппүтүн да кэннэ, баҕар, Сүөдэрим кэлиэ диэн, бүөм санаалаах сылдьаахтыыра. Кини дьолугар, Сүөдэр сэриигэ барбыт утаатыгар уол оҕоломмута. Оҕотун аҕатын аатынан суруйтарбыта.

Настаа биэнсийэҕэ тахсан да баран холкуоһугар субан сүөһүнү көрбүтэ. Бөһүөлэктэн икки көстөөх Улахан күөл диэн сиргэ соҕотоҕун кэриэтэ сайылыыра. Субаннары маныырын быыһыгар кэтэх сүөһүтүгэр оттоон сайыны билбэккэ аһарара. Биир саас, кус-хаас үгэннээн кэлэ турдаҕына, сарсыарда уу баһа киирэ сылдьан кыната эчэйбит тыҥырахтаах көтөр сиргэ хаама сылдьарын көрбүт. Уутун баһан тахсан баран, ампаарга турар эргэ куйууру ылан тутарга быһаарынар. Ити курдук  тэринэн, сэрэнэн тутан ылан көрбүтэ, мохсоҕол аҥаар кыната саҥардыы тостубут эбит. Ону ылан чараас тымтык маһынан чартыы баайан кэбиспит.

Көтөрө бастаан киһи көрөн турдаҕына аһаабат эбит. Кэлин үөрэнэн,  аһыыр кэмэ кэллэҕинэ чыҥыргыыр буолбут. Настаа сайыны быһа бүөбэйдээн көтөрүн үтүөрдүбүт. Көҥүл таһааран ыыппыта, дьиэ таһыттан ырааппакка хас да хонук сылдьыбыт. Онтон сүтэн ыла-ыла көстөр буолбут.

Биирдэ Настаа таһырдьа тахсыбыта, мохсоҕоло ампаар үрдүгэр кэлэн олорор. Өйдөөн көрбүтэ, моонньоҕон куһу аҕалан сытыарар эбит. Мохсоҕол "бу мин  аҕаллым" диэбиттии, чыҥырҕаан бөҕө буолбут. Былыргы ампаар намыһах буолар. Настаа куһу ылан баран үөрүүтүттэн "оо, уолум барахсан кустаанаһатыыһы буолбат дуо" диэбит.

Ити курдук сарсыарда аайы, сороҕор күн өрүү:өрүү, ампаар үрдүгэр биир-икки, ардыгар үс кус сытар буолбут. Маннык икки сыл устата доҕордоспуттар. Настаа сааһын сайылыгар кэллэ да, мохсоҕоло баар буолар эбит.

Арай биирдэ холкуоска оттооһуҥҥа көмөҕө диэн ааттаан устудьуон оҕолору аалбыттар. Уолаттар, кустарын эккирэтэр мохсоҕолу абааһы көрөн, ытан кэбиспиттэр. Настаа ону истэн көтөрүн бэркэ диэн аһыйбыт, уолаттарга хомолтотун эппит. Бу курдук дьикти түбэлтэ буола сылдьыбыт.

Н. Тихонов. Ньурба, Маалыкай. "Кыым" хаһыат 2012 сыл олунньу 23 күнэ.