Былыргы өбүгэлэр кэпсииллэринэн, Баай Байанай уонна Эдьээн Иэйиэхсит - убаайдыы бырааттыы эбиттэр. кинилэртэн убайынан Байанай Барыылаах эбит. Баай-дуол өттүнэн ордук дэлэй уонна эгэлгэ баайдааҕынан Эдьээн Иэйиэхсит эбит. Туох баар ыыраахтаах сүөһү аймаҕын, оту-маһы, күөх торҕону айааччы кини. Ол гынан баран сүрдээх кэччэгэй. Наар кэмнээн, кыратык быһан биэрэр.

Онтон убайа Байанай, эбэтэр Барыылаах, баайын чааһынан быраатынааҕар аҕыйах буолан баран, сүрдээх бэринньэҥ, төлөккөй, балбыаччы соҕус буолар эбит. Ол да буоллар Баай Барыылаах сүрдээҕин кытаатан хаалар түгэннэрдээх, төһө да сордоммутун иһин тугу да кыайан бултаабаккын, суолгар туох да тосхойбот.

Оччоҕо туран маһынан эбэтэр туоһунан кыыл оҥороҕун. Ол кыылгын үөмэн-үөмэн кэлэн ытаҕын. Ол ытан баран, баһын быһан, онтон эмти кырыйан, эбэтэр эмти тутан уокка быраҕаҕын, ас кутаҕын, үөрбүт-көппүт курдук туттаҕын уонна ллгыыгын:

Байдам тутуу,
Барылы кэскил
Баай Барыылаах
Тойон эһэкэм,
Баай хара тыам
маанылаах булдуттан
Быһан кулу даа,
Ураа муостааҕыттан
Уккуйан кулу даа!
Хойутун-хойут да
Бу курдук
Буоһалыыр буол,
Адаар муостааххыттан
Айхаллыыр буол!
уруй! уруй! уруй! -

дэһэллэр, уонна "дьэ бултаа инибит" диэн бөҕө соҕустук сананан баай хара тыаларыгар тахсаллар.

П.Т.Степанов суруйуута, 1945 сыл. (архивтан) "Кыраһа". Кулун тутар ый. 1994 сыл.