Арай биирдэ ыраах оройуоҥҥа Ытарча Ыстапаан диэн биригэдьиир атаспар кустуу айаннаатым. Атаһым миигин оройуон киинигэр тоһуйан, мотуордаах оҥочонон кустуур сиригэр илтэ.Билиһиннэрдэ.

Улахан Бүөтүр - намыһах уҥуохтаах дьарамай киһи, эппэт кэлэҕэй муҥнаах киһи эбит, оҕо эрдэҕинэ улаханнык куттаммытыттан итинник буолбут. Иккиһэ - Уйбаан, турбут-олорбут харса-хабыра суох киһи, аһары элбэх саҥалаах дьабдьыгыраабыт "өрүөл". Улахан Бүөтүр кэлэҕэйдиирин салгыбакка үтүктэр, күлүү, хаадьы оҥостор. Ону испэр ончу сөбүлээбэтим эрээри таспар биллэрбэтим.Нэмнэрин билсибит дьон быһыылаахтар дии санаатым.

Баһылыкпыт Ыстапаан икки көстөөх сиртэн эрдэ бултаабыт кустарыттан аҕалан буһаралларыгар дьонун дьаһайда. Бадаҕа, киэһэ дугдаҕа киириэх иннинэ малааһынныах буоллубут.

Дьоммутун өр кэтэстибит. Дьэ, кэллилэр. Уйбаан, кэм да доҕорун үтүктэн буоллаҕа, кэлэҕэйдээн ыҥырҕаа да ыҥырҕаа буолар. Киэн-холку Ыстапаан кэмниэ-кэнэҕэс тулуйбата: "Уйбаан, олустуугунээ. Солуута суох күнү - дьылы бараама. Онто да суох олус хойуутаатыбыт". Киһитэ өссө күүскэ ыҥырҕыыр. Сүрэ бэрт! Онтон дуо... мотуорун бэрийэ олорбут Бүөтүрбүт эргиллэ түһээт эмискэ бэрт ыраастык, төрүт да тардыалаппакка субурутта эбээт: "Бу киһи табыллыбата ээ, ити кырдьык кэлэҕэйдиир, оттон мин көнөн хааллым".

Соһуйуу-өмүрүү, ыйыталаһыы буолла. Билбиппит, дьоммутун тыатааҕы буулаабыт. Үүтээннэрин аанын аһан эрдэхтэринэ иһирдьэттэн, иккиэннэрин түҥнэри көтөн, бэлэм булка бэрт буолбут кырдьаҕас ойон тахсыбыт. Соһуччута бэрдиттэн кыттыгастаахтарөйдөрүн сүтэрэ куттаммыттар. Түмүгэр ити: бииригэр күлбүтэ бэйэтигэр кэлбит, иккиһэ - үтүөрэн хаалбы.

Василий Колодезников, "Эйгэ" хаһыат редактора. "Кыраһа" бэс ыйа. 1994 сыл.