Биир саас Тирэхтээх диэн күөлгэ кустуу сырыттахпына, наһаа тыаллаах, тымныы күннэр буоллулар. Уубут киһини уйар буолуор диэри хам тоҥон хаалла. Олохтоохтор: "Маннык күннэр буолбуттарын өйдөөбөппүт", - диэн билигин кэпсээн оҥостоллор.

Уу тоҥор тымныытыгар туох булда кэлиэй, мэлийдэхпит дии. Хата, биһиги ити таҥастаах буолан абыранныбыт. Чэй оргутунаары кутаа отуннахпытына, онтон - мантан талах быыһыттан чыычаахтар кэлэннэр уот аттыгар түһэллэр. Тымныыттан тоҥон киһиттэн да куттаммат буолбуттар. Утуйа барарбытыгар, кутаа суоһугар иттэн абыраныахтара дии санаан, улахан кутааны оттон хааллардыбыт.

Кыһайбыт курдук түүнүн тымныы ордук сүрдэннэ. Ыксаан буоллаҕа буолуо, дурдабыт иһигэр биир чыычаах көтөн түстэ. Улаханнык мөлтөөбүт дьүһүннээх. "Эрэйдээх, киһи баарын билэн, абыраттараары киирдэҕэ", - диэн аһына санаатым. Оргууй сэрэнэн тутан ыламмын, итии куул иһигэр уктум. Чыычааҕым бастаан балай да хамсаабакка сытта, онтон ирдэ быһыылаах, тип тилигирэс буола түстэ. Ол түүн чыычаахпыныын бииргэ хоннубут.

Сарсыныгар күн көрөн арыый да итийбитин кэннэ чыычаахпын таһааран ыытан кэбистим. Чыычаах саҥара-саҥара көтөн тырымныы турда. Мин кэнниттэн, көстүбэт буолуор диэри, көрөн турдум. Туох эрэ үчүгэйи оҥорбут курдук, үөрэ, астына санаатым.

Александр Дегтерев "Харса суох быһыы" кинигэтиттэн. "Кыраһа". Муус устар. 4 нүөмэр. 1995 сыл.