Сааны ыйга саатар биирдэ көрүү-истии уонна ыраастааһын булгуччулаах. ыппыт кэннэ уос эркинигэр олорон хаалар буораах, сибиньиэс кэһиэҕэ уонна саа атын чаастарыгар киирбит - сыстыбыт кир төрүт суох буолуоҕар дылы сууйуллар-сотуллар. Кэмигэр ыраастааһын хайаан да наадалаах.

Собуоттан тахсыбыт саа халыҥнык оҕунуохтаммыт буолааччы. Ону атыыласпыт кэннэ сымнаҕас кумааҕынан, өрбүөҕүнэн куурда сотуллар. Кыбычыын сирдэриттэн оҕунуоҕу уһуктаах маһынан ыраастаныллар. Онтон саа уоһун төбөтүгэр өрбөх эриллибит чуумпуурунан сиэркилэ курдук килбэчийиэр диэри анньан баран, нейтральнай арыынан барбах ньалҕарытыллар. Үгэс курдук уоһу ботуруон угуллар өттүттэн чуумпурунан айаҕын диэки хас да төгүл өрө-таҥнары сууралыыллар. Итиннэ уоһу муостаҕа эбэтэр атын туохха даҕаны тирээбэт ордук, тоҕо диэтэххэ кумах эҥин түбэһэн, саа тимирэ тырыыпайдапныан сөп.

Саа мастан оҥоһуллубут чаастарыгар минеральнай арыы сыһыннаҕына, мас биллэ кэбириир.

Саа уоһугар дьэбин олорбут буоллаҕына - тимир суокканан, кыраһыыҥҥа уймуу-уймуу ньылбы анньыллар. Дьэбин күүскэ олорбут эбэтэр тэнийбит түгэнигэр уоһу бир өттүттэн бүөлээн баран, толору кыраһыын кутуллар уонна эмиэ бүөлээн кэбиһиллэр. Сарсыныгар сүөкээн баран, тимир суокканан ыраастаныллар. Кэлин да саан уоһун ыраастыы-оҕунуохтуу сылдьыахтааххын.

Саха ыалын халандаара - 2008.