Аҕыйах сыллааҕыта Кэбээйи Куокуй диэн бөһүөлэгэр олорор Күлээйэптэр диэн ыаллар ынахтарын бөһүөлэктэн соччо ырааҕа суох сиргэ сыһыыга мэччийэ сырыттаҕына эһэ тардыбыт. Ону дьон көрөн ынахтаах ыалга тыллаабыттар. Онуоха дьиэлээх хаһаайын биир атаһыныын тэлиэскэ бырасыаптаах кытай тыраахтарынанынахтарын өлүгүн харайа барбыттар. Сэрэххэ, сүнньүөхтээх доруоп сааны ылбыттар.

Тиийбиттэрэ, ынахтарын өлүгүттэн эһэ син балаччаны сиэбит, бэйэтэ көстүбэт үһү. Тиийбит дьон ынахтарын сэмнэҕин тыраахтардарын тэлиэскэтигэр тиэнэн, дьиэлэригэр төннүбүттэр. Аара бөһүөлэк чугаһыгар кэннилэригэр туох эрэ дьигиһийбитигэр эргиллэн көрбүттэрэ, били тарпыт эһэлэрэ эккирэтэн кэлэн, ынахтаах тэлиэскэлэрин үрдүгэр түһэн, сытырҕалаан эрэр эбит. Дьон тыраахтардарын тохтотоот, тутуһан туран биирэ - сүнньүөҕүнэн, биирэ доруобунан ытан өлөрбүттэр. Онон дьиэлэригэр ынахтарын сэмнэҕин кытта эһэлээх киирбиттэр.

Оччону көрөн баран Куокуй бөһүөлэгэр сөҕүү-махтайыы буолбуттар, сурах садьык бөҕө тарҕаммыт. Сотору улуус айылҕатын харыстабылыттан, милииссийэттэн дуоһунастаах дьон тиийэн кэлбиттэр. Күлээйэп эһэни бултуурга көҥүл кумааҕыта суох эбит, сиэҥин былдьаһан,мсырсан кэлэн саба түспүт эһэни (тыынын көмүскэнэн) өлөрбүтүн иһин бөдөҥ сууммаҕа ыстарааптанар буолбут! Ол улахан ыстараабы төлүүр кыаҕа суоҕун билэн, тойоттор өссө сууттаары улуус киинигэр - Сангаарга илдьэн хаайыыга олордо сыспыттар! Элбэх мөккүөр, кэпсэтии эрэ кэнниттэн Күлээйэби көҥүллээн дойдутугар ыыппыттар. Хаайбатахтар, ыстарааптаабатахтар.

Пантелеймон Дарбасов Томпо, Мэҥэ Алдан. "Кыым"хаһыат 2015 сыл от ыйын 16 күнэ.