Горнай уонна кэбээйи оройуоннарын икки ардыларыгар Сис Күөлэ диэн сиргэ сааһын тухары биир ынахтаах, биир оҕустаах эмээхсин олорбут. Биирдэ ынаҕа күөлүгэр киирэн уулуу турдаҕына, улахан сордоҥ тахсан ууга соһон киллэрэн сиэн кэбиспит.

Эмээхсин сордоох баар суох ынаҕын былдьатан, абаран - сатаран ситиһэрдии санаммыт.Түүнэн сыттык хаатын саҕа мөһөөччүк тикпит уонна иһигэр эмэҕи куурдан баран , уот анньыбыт, уу киирбэт гына тикпит. "Ынахпын сиэҥҥин айахпын сарбыйдын, аны мин илиибиттэн маны амсай!" - диэн баран, мөһөөччүгүн ууга элиппит. Утаакы буолаат, сыттык сүтэн хаалар. Дьэ, ол курдук кыһын ааһан, сайын кэлиитигэр күөл кытыытыгар били сордоҥ куртаҕын уот сиэн өлөн, сытыйан тахса сытарын булбуттар. Сыҥааҕын уҥуоҕун аарка буоллун диэн суолга туруору ууран кэбиспиттэр. Ол иһинэн туркулаах табанан ааһаллара эбитэ үһү. Лаппа уһуннук турбута диэн Кэбээйи кырдьаҕастара кэпсииллэрэ үһү.

Бүлүү Бөтүҥэр чэбдигирдэр, тирии ыарыытын эмтиир уулаах күөл баар. Манна былыр уһулуччу улахан сордоҥ үөскүү сылдьыбыт. Кэлин сытыйан кытыыга тахса сытарын булан, сиһин уҥуоҕун биирдии сүһүөҕүнэн арааран ынах ыыр ыскамыайка гыммыттара үһү.

Саха ыалын халандаара - 2008