Уопсайынан, алыһара суох сиргэ алыһардаабыта буолан күнү-дьылы туһата суох бараабат ордук. Бу балык уу кытыытыгар, уу аннынааҕы үрдэллэргэ, ууга баар туох эмэ хахха (от бөлкөйө, ууга сытар сыгынах) таһыгар хорҕойор. Улахан алыһар дириҥ ууну сөбүлүүр.
Блеснанан алыһардыыр киһи хайаан да куоска оҕото оонньуурун оҥорон көрүөхтээх. Куоска оҕото ойоҕоһугар туох эмэтэ хамсаата да тута сырсан, атаҕынан хабыалаан-охсуолаан барар үгэстээх. Ол хамсыыр эттик тохтоото да тута интэриэһин сүтэрэр. Алыһар син биир оннук ньыманан бултуур. Сороҕор, ыраас ууга алыһар блеснаны хабыалабакка эрэ батыһан иһэрэ көстөөччү. Сорох дьон ону "кыайан сиппэт быһыылаах" диэн блесналарын тардалларын мөлтөтөн, бытаардан биэрээччилэр. Ити улахан алҕас. Алыһар бытаан блеснаҕа тута интириэһин сүтэрэр. Ол эбэтэр болҕомтолоохтук көрөн баран, бу кылабачыгас мал баара-суоҕа тимир буоларын өйдүүр. Онон киниэхэ толкуйдатар түгэн биэрбэккэ (алыһар туох эмэ сонун тэрил ааһан иһэрин көрдө да тугу гынарын өйдүү-толкуйдуу барбакка тииһинэн түһэрин өйдөөн туран) блеснаны субуйан иһиллиэхтээх. Ол гынан баран, блеснаны алыһар төһө да кыһаллыбытын иһин хайдах да ситэн хабар кыаҕа суоҕун курдук субуйан элэҥнэттэххинэ кураанаҕы кууһаргын эмиэ умнума.
"Кыым" хаһыат 2006 сыл сэтинньи 9 күнэ.