• Саҥа тоҥмут мууска сылдьартан сэрэн. Хойуу оттоох, силис, мас баар сиринэн мууһа мэлдьи чараас буоларын умнума.
• Тымныы күҥҥэ килэҥ мууска быраҕыллыбыт балык олус түргэнник  тоҥон амтана дьүдьэйэр. Үөрүйэх балыксыттар хаптарбыт балыктарынэмискэ тоҥмотун курдук дьааһыкка, холуста суумкаҕа угаллар.

• Анньыы төбөтүгэр киһи дэҥнэммэтин диэн эрэһинэ шланганы кэтэрдиллэр.
• Кыһын саҕаланыытыгар балык (сордоҥ, алыһар) сүүрүктээх сиртэн тэйэр, хамсаабат уулаах дириҥ сирдэргэ хорҕойор. Оттон кыһын иккис аҥаарыгар балаһыанньа уларыйар: балык салгыҥҥа наадыйан сүүрүктээх сирдэргэ көһөр.
• Балык туппатын үрдүнэн биир ойбоҥҥо дьөлө хатанан олоруу көдьүүһэ кыра. Ити чааһыгар быраабыла бэрт судургу: төһөнөн элбэх ойбону аллараҕын да, соччонон элбэх балыгы хаптараҕын.
• Кыһын ортотугар күөгүлүү сылдьан балык оонньообот буолла да мэҥиэн кээмэйин кыччатан биэрэн ис.
• Мэҥиэҕин сибиэһэй хаһыатынан суулаама. Типография кырааскатын сыта балыгы үргүтэр (син биир киһиэхэ бензиннээх килиэби сыҥалаабыт тэҥэ).
• Чаҕылхай күннээх кыһыҥҥы күн ойбоҥҥун күлүгүн бүөлүүрүн курдук олор. Эбэтэр хаары табыгынатан ойбоҥҥун хаххалаа.
• Тымныы күҥҥэ күөгүн быата мууһурарын ыраастаан биэрэн иһиэххин наада. Суон быаны балык сөбүлээбэт, үргэр.

"Кыым" хаһыат 2006 сыл сэтинньи 9 күнэ.