Саха киһитигэр улахан ытыктабылы собо ылар. Сахалар соботтон араас суол бүлүүдэни оҥороллор. Сайыҥҥы кэмҥэ собо түргэнник буорту буоларын иһин, балыгы бултуур сиргэ үөлэн астааһын ордук туһалаах.

Собону үөлэн буһарыыга хаппыт үөт, хатыҥ мастары туһаныы ордук. Тиит, бэс, харыйа мастары отуннахха үөлүллүбүт балыкка сылама амтана иҥэр. Үөлүүнү хайдах ыытары саха киһитэ бэйэтэ бэркэ билэр. Уот төлөнө бүппүтүн кэннэ кыһыл чоххо балыгы үөлэн эргитэ сылдьан буһарыллар. Үтэһэ киил кураанах тиит мастан хаптаҕай гына оҥоһуллар. Үөлүү ньымата собо кыратыттан уонна улаханыттан тутулуктаах. Бөдөҥ собону икки хаптаҕай үтэһэҕэ балык икки өртүттэн үөлэн буһарыллар. Итинник үөлүллүбүт собону эргитэргэ улахан сэрэхтээх буолуохха наада. Үөлүллүбүт балык буспутун кэннэ үтэһэтигэр хайаан да сойутуллуохтаах уонна ол кэнниттэн иһиккэ ууруллуохтаах. Маннык астаммыт балык хас да хонукка барыан сөп. Дьиэҕэ киллэрэн баран үөлүллүбүт собону бэйэтинэн сиэххэ сөп эбэтэр кыра арыылаах холордооххо сылытан эмиэ сиэниллэр.

И.И.Тарбахов “Эн остуолун сахалыы астара”, “Якуткига”, 1991.