Бэт былыр сахаҕа Үрүҥ Айыы ойууна диэн баара үһү. Кини үөһээ Үрдүк Айыыга уонна Аан дойду иччитигэр ааттаан кыырар, эбэтэр алгыстааҕынан буолар.

Айыы ойууна, былыргы ааттаах улуу ыһыахха ордук идэтэ тахсан алгыстааҕынан ааттаммыт, онон өссө ыһыах ойууна диэн хос ааттыыллара үһү.

1. Айыы ойууна, үөһээ абааһыларга, аллараа дойду абааһыларыгар кыырбат.
2. Айыы ойууна, өлбүт киһи олоҕор 40 хонукка дылы үктэммэт.
3. Айыы ойууна, кыырара кэллэҕинэ дьиэ ааныттан ольльу-сольльу күн тахсыытын диэкки сэттэ тоҕус моойноох, сиэлинэн, ситиинэн симэммит сэргэлэри анньан туруортуура.
4. Айыы ойууна, алгыс алгыырыгар, тойук туойарыгар: муостаах бэргэһэни, бууктаах, оноолоох соннору, бэдэр саҕынньаҕы, илин-кэлин кэбиһэр кэтэн, наар сахалыы таҥнан, дьалбыырынан кыырар.
5. Айыы ойууна, үс харахтаах, сиэллээх эбир хамыйаҕынан түөрэхтиирэ.
6. Айыы ойууна, арай, үөһэ үрдүк айыыга, аан дойду иччитигэр кыырарыгар симэхтээх ойуун таҥаһын таҥнан уонна кураахтаах дүҥүрү тутан кыырара.
7. Айыы ойууна, орто дойдуга, сир, күн сиригэр туран эппит курдук наар сахалыы таҥаһы таҥнан баран: ыһыахха, ынахсыт тардыытыгар, ситии быһыытыгар, айыыһыт тардарга сылгы кымыһынан, арыылаах суоратынан, (үрүҥ аһынан) аал уот иччитигэр, аан дойду иччилэригэр, бука, бастаан айах туттаран тураналгыс алгыыра, тойук туойара. Кинини батыһан, үтүктэн 79-туу битииһит кыргыттар, уолаттар наар аанньыта, киргэ, дьайга сыстыбатахтар ыллаан, алларастаан, айхаллаан, урууйдаан көтөҕүллэн иһэллэрэ.

Айыы ойууна былыргы кэмҥэ бэт ахсааннаах, аҕыйах буолара үһү.

Окониэсникэп. Борокуопай Майысыайабыс, 70 саастаах, Мугудай нэһилиэгэ Чурапчы оруйуона. Дьокуускай куорат. Ахсынньы 19 к. 1935 с.

Дьячковский Дмитрий Иванович - Сэһэн Боло."Лиэнэҕэ нуучча кэлиэн иннинээҕи саха олоҕо" Бичик-1994 сыл.