Суолгун хара куоска быһа сүүрбүт буоллаҕына, санааҕын түһэримэ. 360 кыраадыс эргилин эбэтэр сиртэн от-мас сыыһын ылан икки гына тоһутан, икки аҥыы быраҕан баран салгыы бар.

Утары кураанах ыаҕыйалаах дьахтары көрүстэххинэ, туох баар былааннаммытын барыта ыһыллар дииллэр. Ол эрээри ыксаама. Ити туолбатын туһугар утары иһэр киһи ааһыар диэри тимэххин тут.

Санааҕар эйиигин ким эрэ ордук санаабыт, куһаҕаны түүйбүт буоллаҕына (иһитиҥ алдьанар, оҕон ыалдьан хаалар уо.д.а.) хайаан да дьиэҕин сууй-хомуй. Бастаан ааҥҥын, түннүк араамаларын көр: онно инньэ анньыллыбыт буолаарай? Буллаххына, илиигинэн ол иннэни тыытыма, пинцетинэн, ытарчанан ылан бырах. Таах ыһылла сылдьар скрепкэлэри, бытархай харчыны, кыра тимир маллары бырах. Ыраас буолуу доруобуйаҕа эрэ буолбакка, дууһа уоскулаҥар эмиэ дьайар.

Сиэркилэҕэ тиһэх көрүммүт дьон дууһалара олорор дииллэр. Онон сиэркилэ бэлэҕи эйиигин үчүгэйдик саныыр дьонтон эрэ ылыахтааххын.

саха ыалын халандаара - 2012