Салама - саха Айыыларга тиксэр, үҥэр сиэрэ - туома. Үксүгэр сайылыкка көһөн тахсааты кытта оҥоһуллуохтаах. Салама туома саха киһитэ айылҕаны кытта чугасыһар, кэпсэтэр биир ньымата.

Салама туома дьону харыстыыр суолталаах уонна Айыылартан уйгуну аҕалар аналлаах.

Салама ыйыыр маһы кырдьаҕас киһи көрдөөн булар эбэтэр уруккаттан туом толоруллар мастаах буолааччылар. Салама тиит, хатыҥ, бэс маска ыйанар, оттон тэтиҥҥэ ыйыыр аньыы. Саламаны ыал ытык кырдьаҕаһа  баайар. Ол баайар мутуга дьиэ туһаайыытынан буолуохтаах.

Саламаны ыйаан баран, уот оттон сир дойду иччитин алҕаа. Саламаны ыйыы туран, ботугураан бэйэ алгыһын этиэххин сөп.

Уһун ситии быаҕа  туос ынаҕы, аты, иһити уонна араас өҥнөөх таҥас кырадаһыннарын баайаллар. Былыр эриэн ситиигэ 9 томторугу, 9 кус куорсунун, 9 таҥас кырадаһынын баайаллара үһү.

Саламаны ыйыырга алгыс этэллэр:

       Аан дойду иччитэ

       Аан Алахчын эбэбит!

       Бэттэх көрөн мичик гын.

       Антах көрөн

       Ымах гын.

       Уйгуну олохтоо,

       Быйаҥы төлкөлөө.

       Нарын - наскыл,

       Күөгэл - нусхал!

Алгыс этэр киһи кымыстаах иһити тутан турар, сиэллээх хамыйаҕынан баһан ылан, салама ыйаабыт маһыгар ыһар.

Алгыс кэннэ дьон төбүрүөннээн олорон аһыыллар, кымыс иһэллэр. Оонньууллар-көрүлүүллэр, күрэхтэһэллэр.

Салама - Айыы далаһата, үрүҥ санаа утаҕа. Дьайы, куһаҕаны киллэрбэт уонна дьолу, уйгуну тадар быа. Салама биир сиэрэ - уруу дьоро киэһэтигэр икки өттүттэн аймахтар эдэр ыал саламатыгар дьолу-соргуну, уйгуну-быйаҥы түстээн, бэйэлэрин саламаларын аҕалан хос баайаллара алгыска тэҥнээх.

Розалия Иннокентьевна Бравина «Саргыны салайыныы» кинигэтиттэн. «Бичик» 2013 сыл.