- Күн устата киһини 44 оһол күүтэр, олортон күрүөлэнэн искэр этиллиэхтээх: «Аҕыс Айыыларым аргыстаһыҥ, сэттэ иэйиэхситтэрим эҥээрдэһиҥ!». Салгыы бэйэҕэр тугу баҕараргын, саныыргын эт, көрдөс.

- Айыы киһитэ араҥаччылыыр, быстахтан, оһолтон күрүөлүүр, куһаҕантан сэрэтэр Иэйиэхситтээх буолар. Дьон иэйиэхсити хомоппот буоларга кыһанар.Күрүөтэ кэбирээбит киһи эрэх – турах санаммат, куттана – кумуна сылдьар, сыыһа – халты быһыыланар, бииртэн – биир кыһалҕаҕа ылларар, ыарытыйара үксүүр. Итинник түбэлтэҕэ Иэйиэхсиккэ туһаайан алгыс аныыллар:

      Эдьэн Иэйиэхситими

      Өрүү чугас буол.

      Сылаас ытыскар олорт,

      Үрүҥ тыыммын өллөйдүү сырыт,

      Хара тыыммын

      Харыстыы сырыт,

      Үрүҥ көмүс

      Сүллүгэскин төлөрүтүмэ.

- Харыстаныы биир сүрүн көрүҥүнэн ытык сиргэ, ытык маска, айан аартыгар бэлэх – туһах биэрии, салама ыйааһын буолар.

- Киирэр ааҥҥа дэйбиири ыйаа. Дэйбиир кири – дьайы үүрэр, чугаһаппат, харыстыыр аналлаах. 

Розалия Иннокентьевна Бравина «Саргыны салайыныы» кинигэтиттэн. «Бичик» 2013 сыл.