Ыам ыйыгар эбэни аһатыы туома оҥоһуллар. Эдьиий Дора сүбэлииринэн, эбэ мууһа ыраастаммытын кэннэ, ыам ыйын 22 - 24 күннэригэр аһатар ордук.

Күөл, өрүс кытылыгар киирэн, арыылаах алаадьы ууруллар. Алаадьыны анаан буһарыллар, мантан биири да ылан сиэниллибэт.

Сарсыарда 11 чаастан күнүскү кэмҥэ диэри киирэн ууруохха сөп. Ортотугар ынах арыытын томточчу ууран баран, алаадьыны күн хаамыытын батыһа төгүрүччү уураллар. Тугу да саҥарыллыбат, ара эбэ диэки хайыһан, искэр саныаххын, көрдөһүөххүн сөп. Ыт-кус, суор - тураах сииригэр кыһаллыа суохтааххын.

Дойдутугар сылдьыбатаҕа өр буолбут киһи эмиэ аан бастаан эбэтин киирэн аһатыахтаах. Алаадьынан эбэтэр үрүҥ аһынан, сүрүннээн суоратынан аһатыллар.. Балыктыах иннинэ эмиэ бу сиэр-туом тутуһуллар. "Эбэм иччитиэ, мин диэки көр, мичик гын, балыкыттан өлүүлээ" диэн баран, суораты күөлгэ, уу кытыытыгар кутуллар. Хайаан да илиин иһинэн кутуохтааххын.

"Саха ыала" ("Саха сирэ" хаһыат  дьиэ кэргэҥҥэ аналлаах сыһыарыыта) Ыам ыйын 12 күнэ 2016 сыл. Автора суруллубатах.