Таптал тыынын тулуйуох.
Мин эйиэхэ этиэм этэ,
Таптал кыыма киирбитин,
Мичээрдээбит сирэйгиттэн
Тиийэн кэлбит үөрүүгэр.
Эмискэччи көрө түһэн
Кылы мүччү тыыммын ылан,
Тиирэ тэбэ сылдьар түөскэр
Иэдэспин сыһыардарбыан.
Тулуйбакка кууһан ылан
Уоскун уураан ылларбыан,
Ханна эрэ ыраах сиргэ,
Куруук бииргэ сырыттарбыан.
Сүрэх тэбэр, сибигинэһэр
Сүрдээх истиҥ туруктар,
Сүһүөхтэрбит киксиһэннэр
Сири билбэт курдуктар.
17.04.2012
Эмиэ таптал туһунан.
Ситэри эппэтим санаабын
Сүрэҕим эйиигин таптыырын,
Толору этиэхпин туттунан
Тэйиппэт баҕаттан куттанан.
Сүрэҕим сүтэриэн баҕарбат
Ып-ыраас эн көрсүө хараххын,
Ол кэннэ истэрин да сирбэт
Туллуктуу тэбиэлиир сүрэххин,
Эн бааргар барыта сып сырдык,
Бардаргын халлаанныын хараарар,
Кут мунан мунчаарар да курдук,
Кэлээккин эмискэ дьэ сырдыыр.
18.04.2012
Кэпсээнтэн кэпсээн
Кэпсээри гыннахха
Кэрэкэ тылларым (Ойуунускайы санаатым)
Кэрэхсиир киһиэхэ
Кэмэ суох буолуоҕа.
Куорумтан кыырайан
Кынаттаах курдукпун
Киэркэйэр күүһүрэр
Килбиэннээх тылларым.
Кыаллыбат кыалларын
Кырдьык да өйдөөтүм
Кыһаллар киһиэхэ
Күүс-көмө кэлэрин
17.02.2012
Илбистээх тыл
Ичээн тылын иччитэ
Иилэн ылар тылларбар
Илбис күүһүн эбэннэр
Ийэ куппар этэллэр.
Ийэ кутум оччоҕо
Иэйиим киирэр кэмигэр
Истиҥ имэҥ тылларбар
Иккис күүһү эбиэҕэ.
Ити эппит тылларбар
Иэйии баарын билэннэр
Истэр дьоннор элбээннэр
Иэйиилэрэ киириэҕэ.
Илдьит кэлиитэ.
Тахсыый дуу эн үрдүк халлааҥҥа
Мин этэр тылларбын тириэрдээр
Ол онтон эн миэхэ тиксэрээр
Ийэ кут иэйиини ыытарын..
Истиий дуу эн куйаар суугунун
Итинник чуп-чуумпу курдугун
Эн баҕар кулгааҕыҥ бүтэйэн
Тыал тыаһын кэриэтэ истиэҕиҥ.
Суох, ити тыал тыаһа буолатах
Ити диэн үөһэттэн ийэ кут
Илдьитин миэхэҕэ ыытарын
Иэйэхсит аҕалыа манна күүт
Айылҕа анала
Хагдаҥ эһэ бөрөлүүн
Хабыр хапсан бараннар,
Хадьырыта ытырсан
Хаанынан халыйбыттар.
Хайалара хоторун
Хабарҕатын хайытан,
Хайдах бутэр түмүгүн
Хантан билиэм буоллаҕай?
Айылҕабыт анала
Ама инник буолуо дуо?
Алгыс тыла инниккэ
Алдьархайы үтэйиэ.
Аан дойдубут айдаана
Алдьатыылаах буолуоҕун,
Алгыс тылбыт биһиэнэ
Алдьархайтан быыһыаҕа
Арыллыы
Бу манна киирэннэр
Алгыһы ыланнар,
Айымньы аартыгар
Үктэниэ этилэр.
Алыптах аартыкка
Айаны билбэккэ,
Аан дойду түгэҕэр
Эмискэ тиийиэхпит.
Куйаары кытары
Ситиммит күүһүрэн,
Этиэхтээх тылларбыт
Уостубат уохтаахтар.
Ким билиэй бу маннык
Хоһоону суруйан,
Күйаартан күүс ылан
Арыллыам этэ диэн.
Биһиэхэ туох саһан
Сытарын билбэппит.
Ол эрэн туох эрэ
Син биир баар буолуохтаах
Эргэ далаһа
Көрдүгэн кырыытыгар
Уҥуор туоруур далаһа
Эргэрбитэ ыраатан,
Эмэҕирэн алдьаммыт.
Аттыгар сабыс саҥа
Суоруллубут маһынан,
Уҥуор туоруур далаһа
Оҥоһуллан үлэлиир.
Хаһан эрэ далаһа
Тахсар күнү көрсүһэн,
Уу ньууруттан тэйитэн
Киэһэлик атаарара.
Бу билиҥҥи түгэҥҥэ
Саҥа сэппит солбуйан
Күнү көрсөн атааран
Эргэриэҕэ дуо ама?
Ити эргиир куруутун
Айылҕабыт көстүүтүн
Хатыланар аналын
Кэрэһэлиир курдуга.
...
Ийэ тыл иэйиитин
Иһиллээн иһэммин
Эмискэ иннибэр
Этэрин иһиттим
Эн баҕар этиэҕиҥ:
-"Эс,оннук буолбатах
ЭйиэхэЭтэрэ
Эрдэтик буолуохтаах".
Доҕоттоор, оннук мин
Дорҕоону тутаммын
Доргуччу туойуохпун
Дохсуннук баҕардым.
Иэйиибит киирбэтин
Испиттэн истэммин
Ийэ кут илдьитин
Иэйэхсит этиэҕэ
Ол оннук түгэҥҥэ
Олбохтон турамын
Ороммун буламмын
Оройбун сынньатыам.
Утуйа сытаммын
Ураты дьиктитик
Урааҥхай тыллары
Уурунан уһуктуом.
...
Таптыыр сүрэх тэбиитэ
Таарыйбыт түгэннэрэ
Тахсан барбат быһыылаах
Таарыллыбыт киһиттэн.
Таайсар сүрэх тапталын
Таабырынын таайарга
Тастан киирэр сүбэһит
Туһалаабат буолуохтаах
Биирдэ киирбит тапталбын
Биэрэр санаам олох суох
Биэрэстэлээх хатыҥҥа
Баран бэлиэ хааллардым
Таптыыр эдэр сурэҕим
Түөһүм иһин тэбиэлиир
Тахсан сүүрүөн баҕаран
Толугуруу мөхсөөхтүүр
Оннук буолар түгэҥҥэ
Ойор тэбэр Сүрэҕим
Обуйукаан уостааҕын
Олус күүскэ уураахтыыр
Оттуу сылдьан
Оҕо сылдьан оту мунньан
Омурҕаҥҥа отуу оттон
Олгуйга солуур ыйаан
От чэйи оргутаммын
Оллоонноон олороммун
Оргууй чэйбин иһэ иһэ
Отуум үрдүнэн үөһээ
Одуулуурбун сөбүлүүрүм
Хантайан олороммун
Халлаан хайдах манныгын
Хаһан хантан үөскээбитин
Хасыһыахпын баҕарарым
Хантан туох өҥөйөрүн
Халлааным түгэҕиттэн
Хаһан тугу ыытарын
Хабан ылыах курдугум
...
Бу түгэн
Баҕардар
Бэрт кылгас
Буолуо диэн
Бэриллэр тылларбын
Бэрийэ сатыыбын
Баҕардар кэнники
Бириэмэ тиийбэккэ
Быыс булуом суоҕа диэн
Буулаатым
Бу сири
Сарсыарда.
Уруй буоллун
"Улуу" дьоҥҥо
Уһаныахтаах
Уостарыттан
Уруккутан
Уһуктубут
Уран тылбыт
Устан кэлэн
Устар уубут
Уйулҕатын
Утуппакка
Улдьаарта.
Уолукпуттан
Умнубакка
Уруучука
Устан ылан.
Ууруллубут
Укулаакка
Уурталыыбыт
Уруйдуу.
Эн дууһаҥ кыланар
Күннээҕи олоҕуҥ түбүгэр сылдьаҥҥын,
Күннэри-түүннэри үлэлиир буолаҥҥын,
Хаарыаннах күммүтүн чаҕылла тыгарын,
Хараҕыҥ далыгар киллэрбэт эбиккин.
Ол оннук сылдьаҥҥын олоҕуҥ бүтүөҕэ,
Айылҕа маанытын көрбөккө хаалыаҕыҥ.
Суох,тохтоо! Эн уоскуй! Эргийэн көрүөҕүҥ
Бу маннык кэрэни куоттаран кээһиэҕиҥ.
Хаһан да бүппэт сыыс,бэйэтэ ылҕаныа,
Хаһан да кэлбэт баай,бэйэтэ кэлиэҕэ,
Ийэ тыл суолтатын ол онно билиэҕиҥ,
Санааҕын түмэҥҥин ол онно тиийиэҕиҥ.
...
Төрөөбүт төрүт тылбыт
Төлкөбүтүн төлкөлүө,
Туллубат тутаахпытын,
Тустаахтык тутан туойуо.
Тоҕо эрэ сорохтор
Тылбыт күүһүн билбэттэр,
Төрүт тылбыт биһиэнэ
Төһүү буолуо биһиэхэ.
Тыл тыына.
Этэр тылбын эппэккэ
Эстэр кыахха киирбиппин,
Тылым тыына хааттаран
Тахсар сири көрдөнөр.
Тохтоло суох тоҥсуйан,
Татым тылбын тобулан,
Этэн тыыммын таһааран,
Эмиэ дууһам уоскуйда.
Өмүрүү
Эмискэ үөһэттэн
Этиҥтэн тэптэрэн,
Эппэтэх тылларбын
Этитэн соһутта...
Ким билиэй ол ону,
Ким ыыппыт илдьитин,
Кимиэхэ аналлаан
Кэпсиэхпин билбэтим.
...
Харлаампый Халлаарап
Хаһыытыыр харчытын
"Хаапайдыыр" гынаары,
"Хаайп" диэҥҥэ укпута.
Харчыта эбиллэр
Халлаантан балачча,
"Хаапайдаан" Халыҥаан
Син элбээн испитэ.
Халлаарап Хаһыытаан
Хаанньаҕа эппитэ:
-"Харчыгын халыҥат
Хамаанда хомунан."
Хаанньата хамаанда
Халыҥын хомунан
Хаһыытыыр харчыны
"Хаайп" диэҥҥэ угаллар.
"Хаһыытыыр харчыбыт
Хаапайдаан халыҥыа"-
Хас да күн Хаанньалаах
Уулара алдьанар.
Харлаампый Халлаарап
Харчытын ылаары,
"Хаайп" диэҥҥэ тиийбитэ,
"Хап" гынан кэбиспит.
Ол онон доҕоттор!
Хаарыаннаах харчыны,
"Хаайп" диэҥҥэ хаһан да
Хаалаабат буолаарыҥ.
Хайп диэн(HYIP)-Высокодоходный инвестиционный проект.