Таптал

Таптал диэн
Быстах имэҥ буолбатах,
Кылбайар ыраас, сырдык,

Уостубат уохтаах,
Умсулҕаннаах,
Дууһа истиҥ иэйиитэ,
Уоскуйуута,
Налыйыыта,
Наскыйыыта,
Сүрэх ыарыыта,
Кыланыыта, Бопторуута.

Таптал диэн -
Өй - санаа өрөгөйө
Күүһүрүүтэ,
Күүрүүтэ.
Инники дьылҕаҕа,
Олох биһигэ,
Дьол суола!

13.11.05



Баҕа санаа

Үрдүккэ көтүөхпүн
Кынатым суох
Элбэҕи билиэхпин,
Арааһы ааҕыахпын,
Билиини баһылыахпын,
"Омуктуу" билбэппин
Истибиппин этиэхпин
Тылым тахсыбат
Талааммын таһаарыахпын
Табыллан биэрбэт

Сахалыы саҥаран
Олоҥхолоон онолуйдарбын
Төрөөбүт дойдубун
Тойукка туойдарбын,
Атаспар анааммын
Айымньы айдарбын,
Олоҕу ойуулаан,
Оһуордаан биэрдэрбин.

Сатыырбын сааһылаан
Саҥаны булларбыт
Кэрэни киэргэтэн
Симии түстэрбин
Дьоҕурбун көрдөрөн
Дьону үөртэрбин,
Самныбат, саараабат
Санаалаах буолларбын,
Билбиппин кэпсээн
Элбэҕи эттэрбин
Сөбүлүүр үйэбэр
Үгүһү ситтэрбин

Соҕотох буолуу
Сорун санаамаҥ
Дьоллоох киһи
Долун билиҥ
Үлэ - хамнас
Үөрүүтүн үллэстиҥ,
Чэгиэн - чэбдик
олоҕу тутуһуҥ,
Күҥҥэ толору
Дьоллоохтук олоруҥ!

14.05.06

Айылҕа

Үрүҥ күммүт
Үөрбүттүү чаҕылыйан
Өрө көттө.

Дьикти нарын
Сибэкки үүммүтэ
Көрүөхтэн кэрэ
Тэтэркэй, кытархай
Санааны күүһүрдэр,
Эрчими эбэр.
Саһархай, сардаҥа
Сарыалын тыгыыта
Угуттуур, нусхатар
Көҕөрөн, унааран,
Сайа охсор
Сылааны таһаарар.

Көҕүөрэн көстөр,
Мутукча сытынан
Дыргыйа тунуйар.

Үүт маҥан,
Кыынньар кымыс
Туматын санатар.
Тула өттүм
Тунал ыһыах
Тойугар холоонноох.
Айылҕа айыыта
Арааһын, аналын
Арааран эттэҕэ
Киһи дууһатын
Өтө көрбүттүү
Үөрдэ турдаҕа

20.05.06

Соҕотохсуйуу

Соҕотохсуйуу, чуҥкуйуу
нүһэр тыыннаах,
Өй- санаа өһүллүүтэ,
Дууһа өлүктүйүүтэ.

Сүтэрбикки мэлдьи
көрдүүркурдуккун,
Көрө - истэ,
Майгынната - маарынната,
Санаабытын барыта алҕас,
сатаммат.
Тус олох тугун толкуйдаабатах,
Туоратык көрүллэр,
Тулаайах курдуккун.
Ийэ истиҥ иэйиитин истибэтэх,
Итэҕэстээх, омсолоох,
Сылдьыбыт, сыыстарбыт,
Эр бэрдин билбэтэх эбиккин.
Арай үрүҥ күн сырдыга,
Төрөөбүт айылҕаҥ кэрэ көстүүтэ,
Үрдүк үлэ, үөрүүтэ - көтүүтэ,
Бар дьоҥҥо итэҕэйии, эрэнии
Санааҥ күүһэ баһыйыа, кыайыа.

Ол эрээри ро тутах.
Тэттик, кэрэгэй эбит.

12.11.05

Кимҥиний?

Хараҕын, сирэйин дьүһүнэ
Тупсаҕай сиэргин ыйар,
Көрөрүн - истэриҥ көрүҥэ
Дууһаҥ кистэлиҥ кэпсиир,
Тарбаҕыҥ, ытыһыҥ дьураата
Инники дьылҕаҕын билгэлиир.
Илииҥ - атаҕыҥ эрчимэ
Үлэһит буоларгын этэр.
Туттарыҥ - хаптарыҥ халыана
Хабар санааҕын быктарыа,
Этэр тылыҥ эҕэтэ
Эйэҕэс буолбатах дэтиэҕэ.

Таҥаһын, симэҕин көстүүтэ
Доруобай буоларга көмөлөөх,
Суругун - бичигин, буочарын
Майгын хайдаҕын араарыа.
Саҥарар саҥан оттомо
Өйгүн - санааҕын тургутар,
Кэтэр көстүүмүн өҥө
Дьылабыай туруккун көрдөрөр.
Киһи төрөөбүт кэмэ,
Күнэ, ыйа, сыла
Аналгын, тапталгын таларга
Суолгун, дьолгун ыйыаҕа.
Бэйэҥ, аҕаҥ аата
Эн Ким буоларгын,
Олоҕу дьиҥнээхтик билэргин
Чопчулаан быһааран биэриэҕэ.

19.11.05

Хом санаа...

Хом санаа куһаҕан өттүнэн
Эйиигин сүрэххин, сүһүөххүн эмэр,
Ааттас, көрдөс, өйгө тутума,
Өйдөө, сатаа, бырастыы гын.

Этэр тыл эгэлгэ элбэҕин,
Илбиһэ дириҥин, сэттээҕин саҥарыма,
Инники кэскилгин, быһаччы быһаарыма,
Кэхтиини, сүтүүнү, сэтэрээн кэпсиэ,
Олоххо дьолу, булбаттыы булкуйуо,
Тапталы таайбат, таабырын оҥоруо,
Оҕону - урууну, төттөрү төлкөлүө,
Куһаҕан куруутун, дьайарын ситиһиэ.

Ордургуур хос санаа хохтоох,
Ситэри эппэтим, үөхпэтим дэтиэҕэ,
Үрүҥү - хараны ханыылаан хардарыа.
Төһөнөн кыайарын, толкуйдуу сатыа,
Олуона тылынан,охторон түһэриэ,
Оҕуруктаах хом санаа албаһа
Аанньанан ааспатын эйиэхэ биллэриэ,
Кэлин кэмсинэн, туһаны ылбаккын.

Эдэр сааска, эрчимнээх эрдэххэ,
Хомуһун тыллары, эгэни, үгэни.
Сатаан тулуйар, киэҥ - холку
Өйдөөх - санаалаах, талыы - мааны,
Киһи бэрдэ, кэрэтэ, дэгэтэ,
Хоргутуу, хомойуу кубулҕат тыынын,
Куһаҕан өскө - сааска тиэрдимэ,
Үйэни уҥуордуур үтүөтэ оҥор!



17.01.06