Саамай аҕалара илин диэки көрөн туран, үс төгүл быһа талайан таһаарар. Ол быспыт отуттан төрдүн - төбөтүн наар тутан ылар, биир тутуму. Уонна иһиттээх умнааҥҥа уган ылар. Онтон онон холлорун муҥунан от төбөтүгэр ыһаллар уонна хотуурдарын үс төгүл сотоллор, биир киһи уокка алгыыр:

Айбыт айыыларыам,
Эйбит эйиэхситтэриэм,
Ойуулаах отум-маһым иччитэ
Сорсу Нуурал Хотун.
Сорсу Нуурал тойон!
Сугас көрө сатыыр гына,
Ыраах истэ сатыыр гына
уйгу быйаҥҥыттан,
Уһун кэһиигиттэн
Ордуктук өлүүлээ,
Быстыбат быйаҥнаа,
Самныбат саргылаа,
Тохтубат дьоллоо.
Тоҕус тоһоҕос оту
Субуруччу туруорар,
Сиир отун сибииниттэн өлүүлээ,
Аһылык отун астыгыттан дьаллыктаа,
Тоҕус сыһыы тохору
Торҕо күөх отун
Дьоллоруттан тускулаа!
Сидьиҥ саныыргыттан силбиктээ,
Үксүөн хаарынан үллүктээмэ,
Тунах сайын тохору
Дьоллоох күнү тосхой!

Онтон бары тус илиҥ диэкин үстүүтэ талайаллар. Алгысчыт алгыыр:

Чогдойор тостума, Ханайдар хабыллыма,
Мэтэйдэр, Бөлчөйдөр булгуруйума,
Тоҕус үйэ тохору тостубат тоноҕостон
Аҕыс үйэ тохору алдьаммат абырыыттан,
Муҥур үйэ тохору булгуруйбат мохсоҕоллон!
Кэлин өттүбүттэн
Уол оҕо хатан ыбын (угун)
Таҥнары тайахтанар күнэ буолла,
Кыыс оҕо суон кыраабыл ыбын
Туора кууһар күнэ буолла,
Уруй-айхал буоллун!

Абыйга 61 саастаах Аммосов В.Е. эппитэ 1945 с. суруллубут. Научнай архивтан. "Кыраһа" бэс ыйа #6/37/ 1995 сыл.