Тохсунньу ыйын алгыһа

Туску, туску, туску!
Таҥханы анааччы,
Түһү олордооччу,
Түөрэхчит баһа,

Үс биһик төрдө,

Уон икки ороҥҥо уйалааччы,
Уон икки мутукка олордооччу,
Кэрэ кэскили тэрийээччи,
Төлкөнү түпкэ түһэрээччи,
Эргэ дьылы эһээччи,
Саҥа дьылы саҕалааччы,
Халлаантан тутулуктаах,
Сиртэн сибээстээх,
Саҥа саҕаланары сабаҕалааччы,
Инники хардыыны иннилээччи,
Таҥхаһыт
Таҥха Хаан Тойон,
Бэттэх көрөн
Мичик гын!
Дом!
 

Олунньу ыйын алгыһа

Муундара, муундара, муундара!
Сир-халлаан кулукутун
Тутан олорооччулар,
Айыы Суолун
Арыйааччылар,
Күн Суолун
Көрдөрөөччүлэр,
Төлөрүйбэт төлкөлөөх,
Уларыйбат уураахтаах,
Сөллүбэт тыллаах
Сүдү Айыылар,
Оҥорууну олохтооччу
Орулуур Одун Хаан,
Ыйааҕы оҥорооччу
Чыҥырыыр Чыҥыс Хаан
Үтүө тыыҥҥытын түһэрэн
Күрүөлээҥ,
Бэттэх көрөн
Мичик гыныҥ!
Дом!
 

Кулун тутар ыйын алгыһа

Хоруу, хоруу, хоруу!
Саханы саха оҥорон
Сандаарпыт,
Киһини киһи оҥорон
Килэппит,
Дьиэни диэлитээччи,
Күрүөнү уһатааччы,
Алтан сэргэни анньааччы,
Аал уоту уматаачы,
Төлкөлөөх түһүлгэни төрүттээччи,
Дэлэй ыһыаҕы тэрийээччи,
Түөрэм туйахтаах,
Нэлим сиэллээх,
Сиэр дьүһүннээх,
Доллу кулгаахтаах,
Санныгар дьаҕыллаах,
Самыыиыгар таҥара бэлиэлээх,
Күн Дьөһөгөй!
Айыы тойон,
Бэттэх көрөн
Мичик гын!
Дом!
 

Муус устар ыйын алгыһа

Дьаралык, дьаралык, дьаралык!
Үөскүүрү төрүттээччи,
Кэскили тэрийээччи,
Уол оҕо кутун ох оҥорон
Уҥа хонноҕор кыбыммыт,
Кыыс оҕо кутун кыптыый оҥорон
Хаҥас хонноҕор кыбыммыт,
Тэллэҕэр имэҥнээх,
Суорҕаныгар дьалыҥнаах,
Биири биэс гынааччы,
Биэһи биэс уон гынааччы
Иэримэ дьиэни тэрийээччи,
Көмүс ньээкэ уйаны олохтооччу,
Таптал таҥарата,
Дьиэ - кэргэн төрдө,
Айыыһыт
Ийэ хотун,
Бэттэх көрөн
Мичик гын!
Дом!
 

Ыам ыйын алгыһа

Күөгэл-нусхал, күөгэл-нусхал, күөгэл-нусхал!
Уйгуну оҥорооччу,
Илгэни биэрээччи,
Ойуулаах от-мас төрдө,
Хамсыыр-харамай ийэтэ,
Амарах санаалаах,
Аһыныгас сүрэхтээх,
Атаҕар алгыстаах,
Илиитигэр эҕэрдэлээх,
Күүгэннээх хоннохтоох,
Көлөһүннээх сүүстээх,
Эбирдээх муруннаах,
Иһэгэйдээх ытыстаах,
Биири биэс гынар,
Биэһи биэс уон гынар
Күн Иэйиэхсит
Тйэ хотун,
Бэттэх көрөн
Мичик гын!
Дом!
 

Бэс ыйын алгыһа

Айхал, айхал, айхал!
Аан дойдуну
Айан - тутан оҥорбут,
Орто туруу дойдуну
Огдолуйбат олохтообут,
Айыы аартыгын арыйбыт,
Күн суолун тобулбут,
Айыы киһитин
Арҕаһыттан тэһииннээбит,
Күн киһитин
Көхсүттэн көнтөстөөбүт,
Үүс-киис тириитэ
Өллүргэлээх бэргэһэлээх,
Үүс-аас бэйэккэлээх,
Үүт-таас олбохтоох,
Үкээр куйаас тыыннаах
Үрүҥ Айыы Тойон,
Бэттэх-бэттэх көрөн
Мичик гын!
Дом!
 

От ыйын алгыһа

Нарын-наскыл, нарын-наскыл, нарын-наскыл!
Үүнэри төрүттээччи,
Быйаҥы биэрээччи,
От анныгар обугунаспыт
Ойуу-бичик уолаттардаах,
Сэбирдэх быыһыгар сибигинэспит
Ойуу-бичик кыргыттардаах,
Үүс кыыл тириитэ бэргэһэтин
Эҕэтэйдии кэппит,
Киис кыыл тириитэ саҕынньаҕын
Ньэлэккэйдии кэппит,
Баһыы көмүс тарбахтаах,
Көҕүөр-таһыар эмиийдээх,
Күскэм-тускул,
Айхал-мичил,
Аан-Алахчын
Хотун ийэбит
Бэттэх көрөн
Мичик гын!
Дом!
 

Атырдьах ыйын алгыһа

Алыас, алыас, алыас!
Аан дойду арчыһыта,
Күн сирин сүлгүөрдьүтэ,
Кырдьыгы кылбатааччы,
Дьиҥи килбэтээччи,
Көлдьүнү көтүтээччи,
Кубулҕаты үтэйээччи,
Тыыны уһатааччы,
Көхсүнү кэҥэтээччи,
Айыы быатын туттарааччы,
Хараҕы сырдатааччы,
Уордаах Дьаһабыл,
Буура Дохсун,
Аан Дьааһын,
Дьаа Буурай,
Сүрдээх-кэптээх
Сүҥ Хаан эһэбит,
Бэттэх көрөн
Мичик гын,
Дом!
 

Балаҕан ыйын алгыһа

Сүлүгүр, сүлүгүр, сүлүгүр!
Тдэни биэрээччи,
Дьоҕуру арыйааччы,
Нүһэр тыллаах,
Сүдү бэйэлээх,
Тоҕус мутукка уйалаах,
Тоҕус чуолҕан харахтаах,
Куулаттарар төрдө буолбут,
Уһуйар баһа буолбут,
Үөрэх төрүттээх,
Биир биэриилээх,
Айары анааччы,
Тутарытуһаайааччы,
Сөллүбэт-өһүллүбэт
Сүдү андаҕардаах
Улуу Суорун
Тойон эһэбит,
Бэттэх көрөн
Мичик гын,
Дом!
 

Алтынньы ый алгыһа

Уруй,уруй, уруй!
Түмсүүнү төрүттээччи,
тэрээһини олохтооччу,
Далааннаах өйдөөх,
Дархан олохтоох,
Эҥсиилээх санаалаах,
Өрөгөй талааннаах,
Санныгар саргылаах,
Түөһүгэр төлкөлөөх,
Тоҕус холбооһуннаах
Хорсун сүрэхтээх,
Сүҥ Хаан,
Сүҥкэн Эрили,
Аан Тайбыыр,
Ала Мондоҕой,
Хомпоруун
Хотой Айыы,
Бэттэх көрөн
Мичик гын,
Дом!
 

Сэтинньи ый алгыһа

Һук, һук, һук!
Дьолуону тосхойооччу,
Өлгөмү биэрээччи,
Хара тыа хаһаайына,
Тумул тыа тойоно,
Кыһыл саһыл кымньыылаах,
Ой буур оонньуулаах,
Көй боллох сэксэ олохтоох,
Сөҥ сөгөлөөн тусаһалаах,
Эһээ диэтэххэ,
Эһээ диэччи,
Бардам Туттуу,
Барылы кэскил,
Барылаах
Баай Байанай Тойон эһэм,
Бэттэх көрөн
Мичик гын,
Дом!
 

Ахсынньы ый алгыһа

Лох, лох, лох!
Билиини биэрээччи,
Өйү үксэтээччи,
Кулгааҕы тобулааччы,
Хараҕы арыйааччы,
Сайаҕас санаалааччы, исээн эттээччи,
Этитиини төрүттээччи,
Түмүгү сүөрээччи,
Бэлиэни этээччи,
Сиби сэрэйтэрээччи,
Үөрэх төрдө,
Билии баһа,
Билгэһит
Билгэ Хаан,
Бэттэх көрөн
Мичик гын!

Дом!

Халандаар-2006