Аар баҕаҕы тула
Араҕас чэчир анньылынна,
Симэхтээх ссиксиктээх
Сири иһит сириэдийдэ,
Симиир иһит сирэлийдэ...
Талахтаах, таҥалайдаах
Тамалҕан чабычах ахтылыйда,
Чороон аах чуоҕуста,
Кэриэн айах кэккэлэстэ,
Аар сэргэ эриэн ситии курданна,
Бөлөх сиэл
Торбос томторуга тулаланна,
Өрбөх өттүк өйөнүстэ,
Чаллах сарын тайаныста.
Кытыгырас атахтаахтар
Кылыйан кыыралдьыттылар, чуор чаҕаан тыллаахтар
Чуоҕустулар, алтан айхтаахтар
Айаардылар.
Ытык кырдьаҕас
Ыар тылбын ылынан истиҥ!
Аан дайдыны айбыт
Аҕыс ураһа дьиэлээх
Аан Алахчын Хотун эбэм,
Бэттэх-бэттэх буолан
Мичик гынаргар көрдөһөбүн.
Төрүүр сүөһүнү
Төлкөлөөбүт,
Иитэр сүөһүнү иччилээбит
Дьөһөгөй Тойон эһэм,
Дьөһүөлдьүт Хотун эбэм,
Бэттэх-бэттэх буолан
Мичик гынаргытыгар
Көрдөһөбүн.
Төрүүр оҕону
Төлкөтүн суруйааччы
От-мас иччитэ
Ойуу-бичик уолаттар,
Ол аннынан
Обугунаспыт оҕолор,
Кылыс аннынан
Кыҥкынаспыт кыргыттар,
Бэттэх-бэттэх буолан
Мичик гынаргытыгар
Көдөһөбүн.
Ааттаах атыырбын
Аас сэргэтигэр баайдым.
Аан дайдын айбыт
Аҕыс ураһалаах
Аан Алахчын хотун эбэм,
Оһүөрдаах уктаах
Удьаа хамыйаххынан
Эмийиҥ кэрэтигэр
Диэри быган олорон
Үрүҥ илгэҕинэн
Үс түбүрүөннээх
Аан Ийэ Дайдыны
Аһатаргар көрдөһөбүн!
Уруй! Уруй! Уруй!
Е.С.Герасимова, Таатта оройуонун Чөркөөх нэһилиэгэ, 1965 с. суруйбут (ССНК архыыба, 5 ф., 13 уоп., 124 дь.)