Аҕыс саха ахтар Айыыһыта,
Үс саха үҥэр Айыыһыта,
Үс хаттыгастаах
Өндөл саҥан халлаан
Үрүт өттэгэр үөскээбит,
Өлбөт уһун үйэлээх,
Үгүһү үөдүппүт, элэбҕи тэниппит,
Үүнэн баран өлбөнүйбэт оттоох,
Көҕөрөн баран хагдарыйбат мастаах,
Үөскээн бпрпн өлбөт сүөһүлээх,
Төрөөн баран төннүбэт киһилээх,
Сырдаан баран хараҥарбат халлааннаах,,
Тахсан баран киирбэт күннээх,
Кыһына суох сандал дайдылаах,
Үүс-аас бэйэлээх,
Үрүҥ чачыр тутуурдаах,
Өлбүргэ нуоҕай бэргэһэлээх,
Үрүҥ былыт үктэллээх,
Үүт таас олбохтоох
Үрүҥ Айыы Тойон
Аламай күн алын өттүгэр,
Аан дайдым алтан быарыгар
Айыыһыттаах киһини айарын саҕана
Эппит тыла:
Самнаархай санаалаах
Сайаҕас тыыннаах
Саха урааҥхай
Саллар кырдьар сааһыгар
Этэ-хаана эмэхтийэн,
Уҥуоҕа-иҥиэҕэ уйадыйан,
Кута-сүрэ
Күөх маҥан халлааҥҥа
Күөрэгэй чыычаах буолан
Көтөн хаалар оҥоруулаах.
Ол илин өттүгэр
Дьоллоох олоххо олорорго,
Дьолу-саргыны тэрийэргэ,
Алгыс баһын айхаллыырга,
Алаһа дьиэни тэрийэргэ,
Аал уоту отторго анллаах диэн,
Айбыт айыыларыам,
Айхаллаабыт айхалгыт!
Алаһа дьиэм аҕыс маҥанатын
Аҕыс үйэ тоххору алдьаарытымаҥ,
Дьоллоох уйам тоҕус маҥанатын
Тоҕус үйэ тоххору тулхаргатымаҥ!
Иэримэ дьиэни сэттэ маҥанатын
Сэттэ үйэ тоххору дьиэгэнэтимэҥ!
Үөһээҥҥи дайдыттан
Өлүү бөҕөнү дуксутубаҥ!
Орто дайдыттан
Оһол бөҕөнү дуксутубаҥ!
Аллараа дайдыттан
Алдьархай бөҕөнү дапсытыбаҥ!
Аал уотум иччитэ,
Алдарааттан алдьатар
Абааһы аймаҕын аҕалбакка,
Көй сириэһиҥҥинэн
Таҥнары уһуура тур!
Орто дойдуттан
Оһол кэлиитигэр
Кыыдааннаах кыымҥынан
Төттөрү дьарыйа тур!
Үөһээ дайдыттан
Үлүгэр бөҕө түһүүтүгэр
Үөрбэ төлөҥҥүнэн
Өрө охсо тур!
Айбыт айыыһыттарыам,
Төннүбэт төрүөҕү
Миэхэ төлкөлөөҥ!
Кэхтибэт кэргэни
Миэхэ кэскиллээҥ!
Бигэ-таҕа кэскиллээх
Биһиктээх оҕону
Миэхэ билгэлээҥ!
Ийэм ууһун
Тоҕус үйэ тоххору
Чуордук сураҕырдыҥ!
Аҕам ууһун
Аҥардастыы аатырдыҥ!
Арҕары аҕа уустааҥ,
Тиһэ нэһилиэктээҥ!
Субуруччу улуустааҥ!
Тоҕус курдуулаах
Туос ураһасаҕа
Самнан түспэт саргылааҥ!
Атаах үтэтэ,
Сатыы хонуга оҥоруҥ!
Ааспыты аһаттарыҥ,
Тоҥмуту итиэттэриҥ!
Уруй-айхал олоҕурдун!
Элиэр эттээх,
Ириэнэх хааннаах,
Эргийэр иэччэхтээх,
Эҥээркэй саҥалаах,
Эгилгэ санаалаах
Икки атахтаах бииһин ууһугар
Иитэр сүөһү ийэ кутун
Эйиэхсит хатыҥ
Иҥэрэрин саҕана
Эппит тыла:
Эгтлгэлээх олоҕу олорорго,
Эбир ыһыаҕы ыһарга
Анаабыт айылгыларбыт
Айбыт айыылара,
Оҥорбут оҥоруулара,
Уруйдаабыт уруйдара.
Иитэр сүөһүм
Эйбит Эйиэхситэ
Эбир ыһыахпын
Кэскиллииргэр көрдөһөбүн!
Аҕыс үйэ тохору
Алдьанан түспэт
Аар баҕаҕы астар!
Тоҕус үйэ тохору
Тохтон түспэт
Тоҕой сэлэни астар!
Туораах кулуну тистэр!
Сэттэ үйэ тохору
Сиҥнэн түспэт
Далбар чачыры астар!
Үс хат тэлэмэн тэрчини тартар!
Тоҕой сэлэбин
Тоҕус сүһүөхтэт!
Сири ыаҕаспын
Сиҥнэн түспэт кэскиллээ,
Чороон айахпын
Тохтоон түспэт саргылаа,
Кэриэн ымыйабын
Кэйбэстэн түспэткэскиллээ,
Охтон түспэт Одун Хаан
Оҥоруулаах остуоллаа!
Тохтон түспэт
Тойон сэргэни
Дьоллоохтук туругурт!
Тоҕус үйэ тохору
Иитэр сүөһү
Ахтылҕаннаах айыылара
Баай Малахай Тойон,
Баай Малахай Хатын
Кылгас хотоммун уһат,
Кыараҕас тиэргэммин кэҥэт!
Үрүөлээх торбоһуүөрдээ,
Көҕөннөөх кулуну көлчүт,
Ырыган бэйэлээхпинырҕа дьаамнаа,
Курус куҥнаахпын
Толору куҥнаа,
Бычыкаа былчыҥнаахпын
Ситэри былчыҥнаа,
Чараас хаһалаахпын
Халыҥ хаһалаа,
Синньигэс сааллаахпын
Суон сааллаа!
Үтүрүммүн үүттээ,
Туҥуйбун уоһахтаа!
Кытарахпын кымыстаа,
Тыйыттан буоһуур сылгылаа,
Тыһаҕаһыттан ынахтаа,
Үөскүүр сүөһүбүн
Үөлэннии үөскэт,
Төрүүр сүөһүбүн
Төрөллөөх төрүөхтээ,
Үүтүнэн силбиктээ,
Кымыһынан чалбахтаа,
Быстыбат быйаҥнаа,
Тохтубат дьоллоо!
Тойон дойдум иччитэ
Тоҥсулаан Тойон,
Аан дойдум иччитэ
Аарай Хатын эбэм
Алаас сыһыыбар
Ача күөх отун
Астыгыттан үүннэр!
Итириктээх оккун
Имитэн сүтэр,
Аһыы оккун адьас сүтэр!
Аһыҥаны-тыгаайыны
Алааспар аҕалыба.
Ыарыыны-сүтүүнү ыраатыннар!
Суту-сүтүүнү чугаһатыма,
Кыһалҕаны кырыыһы кытарыба,
Кыдьыгы-тыалы түһэримэ!
Уруй-айхал олоҕурдун,
Уруй-тускул улааттын!
Айбыт айыыларыам,
Аҕыс өргөстөөх
Аламай күн
Алдьанан түһүөн иннинэ
Аҕа дайдым аатын аралдьытыма!
Тоҕус үөстээх
Тойон байҕал
Туой кумах буолуон иннинэ
Туруу дайдыбын
Сураҕын уларытымаҥ!
Аан дайды үрдүнэн
Айхал ананнын,
Улуу дойдум үрдүнэн\
Уруй олоҕурдун!
Уһун үйэ салҕаннын,
Ордук үйэ салҕаннын.
Күн айыыларыам,
Күн диэкиннэн
Күөрэгэй чыычаах буолан
Көрүлүү-нарылыы туруҥ!
Айбыт айыыларыам,
Аргытан кыталык буолан,
Аламай күн аннынан
Аҥаарыччы эргийэ туруҥ!
Уруй-уйхал буоллун,
Туску улааттын!!!
Г.М.Васильев 1945 c.. суруйбут тылыттан Абый улууһун Муҥурдаах нэһ. олохтооҕо Б.Е.Аммосов, 68 саастаах маннык иһитэннэрбитэ (ССНК архыыба, 5 ф.,3 уот., 676 дь.).