Күөл иччитэ –
Күөх эбириэн оҕустаах
Күбэй баай хотун,
Көмүс хатырыктааххыттан
Күндүлээн көрүүй даа,
Босхо бастаах,
Бокуйар сүһүөхтээх,
Буор көһүйэлээх
Бороҥ урааҥхай
Бобуу хара күлүккэр
Бокулуон ууабын.
Хоолдьуктаах бэйэм хоҥкуйдум,
Иэччэхтээх бэйэм көрдөстүм,
Тыҥалаах бэйэм уҥнум.
Урукку да өттүгэр
Онолуйар тойукпун
Ураахсылыыр буоларыҥ,
Ааттаһар тылбын
Аһынар баарыҥ.
Үйэттэн үйэ тухары
Эн үрдүк ааккар,
Эн дьоллоох туонаҕар
Мас тымтайдаах мадьаҥныыра,
Туос тымтайдаах ньохчоҥнуура,
Илимнээх ибиҥниирэ,
Ардьалаах алтахтыыра,
Эрдэ турааччы элэҥниирэ,
Хойут утуйааччы хороҥнуура,
Аччык тоторо,
Ааспыт астынара,
Ириннньэх тэмиэгирэрэ.
Баччыр барҕарара!
Күбэй баай эотуон!
Көрдөһүүбүн көдьүүстээ даа!
Ааттаһыыбын араҥаччылаа даа!
Арбайбыт албан ааккын,
Сохсойбут дьоһун сураххын
Суурайыма даа,
Суох сордоохторгун,
Дьадьаҥы дьаллыктаахтаргын,
Кыаммат кыдьыктаахтаргын
Аһынан көрүүй!
Ааттаһар да ахсааннаах,
Көрдөһөр да күттүөннээх,
Күбэй хотун эбэкээм!
(В.М.Бубякин, Мэҥэ-Хаҥалас оройуонун II Наахара нэһ., П.Т.Степанов 1945 с. бэс ыйын 30 к. суруйбута. ССНК архыыба, 5 ф., 3 уоп., 659 дь.).