Кыстыгы этэҥҥэ туораан күөххэ үктэниэх иннинэ – ыам ыйыгар сахаҕа былыргыттан арчыланар, ыраастанар үгэс олохсуйбут. Кыс устата мунньуллубут бөх эргэ дьылтан хаалбыт кир буолан, өҥ-быйаҥ олохсуйарын мэһэйдиэн сөп. Дьон тиэргэннэрин, дьиэлэрин ыраастыыллар, бөхтөрүн уматаллар, ол буруота ийэ-сиргэ сатыылаан, бэйэтэ туспа арчы буолар.

Сайын бастакы этиҥ эттэҕинэ: «Үллэр этиҥ, Буура Дохсун Аан дойдубутун уоттаах чаҕылҕанынан арчылаан, кыһыны быһа кыстаабыт кыдьыктары кыйдаата, дьаҥы-дьаһаҕы дьалбарытта, үөл дьүөмэ өҥөлдьүйэр үөрдэри үүртэлээтэ, салбаҕырбыт салгыны ыраастаата», - дииллэрэ уонна арчы туомун толороллоро. Онуоха синньигэс талаҕы эбэтэр хахыйаҕы ылан, үөһээҥҥи мутуктарын уонна сэбирдэхтэрин ордорон,  төрдүн сулуйуллар. Дьиэни төгүрүйэ сылдьан, талаҕы таһыйа – таһыйа алгыыллар:

      Орой Буурай оонньоото,

      Дьаан Хаан дьааһыйда,

      Аан дойдуну аччылаата,

      Аан-аччы, Аан-аччы!

Кыра оҕо, эдэр киһи сүүһүн күлүнэн биһэллэрэ – уот иччитэ Аан Уххан ыраастаатын, араҥаччылаатын диэн.

Кирдээх киһи сырыттаҕына эбэтэр дьаҥ турдаҕына, этиҥ охсубут маһын тырыыҥкатын уматан дьиэни уоту арчыланар.

Хобордооххо кытыанэбэтэр сугун абаҕатын уматан, буруолатан дьиэни – уоту, тэлгэһэни арчыланар, ыарыы – дьаҥ кыттыспатын, кир – дьай сыстыбатын, абааһы – адьарай алтыспатын диэн күрүөлэниллэр.

Розалия Иннокентьевна Бравина «Саргыны салайыныы» кинигэтиттэн. «Бичик» 2013 сыл.