Биир киилэ көбүөрү бэлэмнииргэ 500 г. ынах арыыта уонна 2,5 ыстакаан ыаммытынан үүт наада. Дьиэ иһинээҕи сылааска ирбит сымнаҕас соҕус арыыга көннөрү сылаас ыаммытынан үүтү кутан, муос ытыгынанбиир тэҥник, эрчимнээхтик ытыйыллар.

Арыы үүтүн ылан истэҕин аайы эбии кутан иһиллэр. Аны сылаас үүккэ арыы олус убаан хаалар, ол иһин, сорох кутууга тымныыны кутуллар. Үчүгэйдик тахсыбыт көбүөр мөлбөркөй, күөгэлдьигэс уонна ньалҕаархай буолар.

Килэмсэ гына миискэҕэ тоҥорон, хоҥнорон баран, дьоҕус гына көйөн, арыы оннугар сиэниллэр. Көбүөрү тупсаҕай кыра иһиттэргэ эбэтэр ыраас салапааҥҥа алаадьылыы кутан тоҥоруохха эмиэ сөп. Сорохтор саахардаан, кондитерскай испирииһинэн кыра- кыра гынан ыган, тоҥ күөрчэх курдук көннөрү сиэниллэри эмиэ оҥороллор.

Көбүөрдээх лэппиэскэни оҥорорго, арыый да кытаанах буола буспут лэппиэскэни сойута түһэн баран, сэрэнэн кыра гына кубиктыы кырбыыгын уонна көбүөргүн кытта булкуйаҕын. Иһиккэ кутан баран тоҥороҕун, элбэх киһилээх бырааһынньык аһын биирдэ туттуллар пластмассовай тэриэлкэҕэ тоҥоруохха сөп.Тоҥо түспүтүн кэннэ үрдүн салапаанынан сабан кэбистэххэ, салгыны киллэрбэт.

Саха ыалын халандаара - 2008