Саха ыала сарсыарда аайы күөрчэх сиир үгэстээх. күөрчэҕи чөчөгөйтөн эбэтэр маҕаһыынтан ылар өттүбүт 25, 35 % -нах убаҕас сүөгэйинэн бэлэмниибит.

Түгэхтээх соҕус иһиккэ икки ыстакаан чөчөгөйү кутан, күөрчэх ытыгынан биир кэм эрчимнээхтик, күөгэччи ытыйыллар. сорохтор аныгылыы миксеринэн эрийтэрэллэр. күүгэнэ уостубат уонна ытыгынан мөрү мөлбөчү баһыллар буоллаҕына, күөрчэх бэлэм. Ол кэнниттэн бэйэ сөбүлүүрүнэн сир аһын, барыанньаны кутан араас өҥнөнүллэр. Холобур, отону былаан кытардыахха, хаптаҕаһы былаан тэтэркэй өҥнүөххэ сөп, онтон сугуну эптэххэ көҕөрөр. Дьэдьэннээх, киис тиҥилэхтээх күөрчэх өҥө чаҕылхайа суох да буоллар, олус минньигэс буолааччы. Сорохтор уулаах отон барыанньатын хойуутук кутары сөбүлээччилэр.

Ол кэнниттэн кыра киэп иһиттэргэ, көннөрү ньуосканан томточчу баһан кутан тоҥоруллар. Тоҥмутун кэннэ, салгыҥҥа сиэппэт наадатыгар, целлофановай мөһөөччүккэ, пакекка харайа охсуллар.

Оттон алыс тоҥу биһирээбэт хаһаайкалар курустаал фужердарга, бакаалларга кутаталаан, көннөрү сойутан, остуолга аҕалыахтарын сөп.

Саха ыалын халандаара - 2008