Алын Дьоохуга Даркы диэн күүстээх-уохтаах, сытыары-сымнаҕас киһи аҕыс кырыылааҕа олорон ааспыт. Үйэ сайдан, бу киһи манна улахан дьиэ туттаран, таһыгар ампаар оҕустаран сэниэ ыал аатын ылан олорбут.

Бары да ытыктыыр, улаханнык убаастыыр кырдьаҕаспыт, биллиилээх топонимист, үлэ сүнньүнэн балачча алтыспыт аҕа табаарыспыт М.С. Иванов-Багдарыын Сүлбэ “Киин куорат” хаһыакка  да, бу “Кыымҥа” да сир-дойду аатын туһунан тиһигин быспакка суруйарыгар, хайаан да кэлэн, көстөн, сэһэргэһэн ааһарыгар, бу санаатахха, үөрэнэн хаалбыт эбиппин. Хайдах эрэ суохтуубун. Михаил Спиридонович, билэргит буолуо, ыарытыйар буолан, уонна сааһырдаҕа даҕаны, дьиэтиттэн тахсыбат. Кини ыччат дьон аахтын, биллин, туһаннын диэн, олоҕун кэрэ-бэлиэ кэмнэрин, топонимикаҕа анаабыта. Уопсайынан, кини суруйууларыгар дириҥ билии сылдьар диир оруннаах. Өссө инньэ сүүрбэ сыллааҕыта “Сахаада”  (05.09.1996) хаһыакка СӨ Култууратын туйгуна Прокопий Флегонтов Багдарыын Сүлбэ туһунан: “Михаил Спиридонович топонимиканан дьарыктанан, 300 тыһ. тахса (!) сир аатын суруйан, картотекаҕа киллэриитэ бу историяҕа умнуллубат кыһыл көмүс кылаат, улахан үлэ муҥутуур чыпчаалын курдук, үйэлэргэ  үөрэтиллэн, ааттанар баараҕай үлэ быһыытынан сыаналаныаҕа”, – диэн дэлэҕэ этиэ дуо! Күндү киһибитин итинник иһирэхтик ахтан туран, мантан аллара “Үс... Сэттэ... Тоҕус” диэн кинигэтиттэн быһа тардыыны билиһиннэриэхпин баҕардым.

   Бүлүү улууһун Хампа нэһилиэгэр Афанасий Федотович Егоров уонна Евдокия Александровна Егорова диэн 80-нарын ааспыт эмээхсиннээх оҕонньорго сырыттым. Ытык кырдьаҕастар элбэх сэһэннээх, кэпсээннээх буолан биэрдилэр. 

Бу үһүйээни, дьиҥнээх олоххо буолбут түбэлтэни, мин Эбээн Бытантай улууһуттан төрүттээх, билигин Дьокуускайга олорор Мария Дыдаеваттан истибитим.

Кини аата Николай Васильевич Данилов диэн эбит. 1860 с. диэри Илин уонна Арҕаа Хаҥаластар биир улуус эбиттэр. “Хаҥалас улууһа” диэн. Ону бу Данилов кулуба үс сылы быһа арахпакка туруорсан, үҥсэн-харсан, улууһу икки гына араартарбыт.