Нуучча омук саха сирин була илигинэ Бороҕон улууһун сиригэр Бэрт Хара диэн олорбута үһү. Кини олоҕо Кыыс Хаҥа диэн үтүө сиргэ Хаас уҥуоҕа, Кыһыл сыыр диэн өтөххө, томторго үүтээннэнэн олорбут эбит. Бэт Хара үксүн ийэтиттэн ураты кэргэннэҕэ сэһэн буолбат этэ, арай Эбэрикээн эмээхсин диэн ийэлээҕэ эрэ кэпсээн буолара. Бэт Хара илин тоҥус дойдутуттан ылдьан туой бултаан, кыыллаан, куобахтаан иитинэрэ. Ол сылдьан туойун тоҥустары кытта охсуһара. Оччотооҕу дьон үҥүү, батыйа, кураахтаах ох саа кыргыһар, бултуур сэптээх буолаллара.
Бэт Хара чугас, дойдутугар Тойон Мүрү диэн үтүө дойду - сир күөлүгэр куйуурдаан, туулаан балыктаан аһыыра, кини икки тиит чөҥөчөгүн ыпсары наарбалаан түөрэй оҥосторо.Хайа да күн куйуурун күөлүгэр уган баран биир булкуйуунан ылан оттору мастары, бадарааннары, үөннэр туох кэлбитин олоччу сол түөрэй мастары холбуу биирдэ сүгэн дьиэтигэр таһаарар. Бэт Хара оччотооҕу да сахаҕа бөдөҥ улахан киһи буолан, муҥураат тиит саҕа уҥуохтаахха холууллара. Кини олус быһый, ытааччы, бөҕө эбитэ үһү.
Киниэхэ биир кэмҥэ Хаҥалас Тыгын Тойон сэриилээх, бэт дьонноох, уолаттардаах, ыыр биэлээх тахсан, Тойон Мүрүгэ ураһанан түһэн, сайыҥҥы кэм үтүө ыһыах оҥорон, Бэт Хараны ыҥыттаран күндүлээн туран албыннаан тутаары, өлөрөөрү оҥостон баран, олус бэрдиттэн, быһыйыттан дьулайан төннөр.
Бэт Хара эр оттото буолтун кэннэ куолутунан илин дойдунан тоҥустарга тахсан бултуу сырыттаҕына тоҥустар көрсөн ытыһан, охсуһан баран тэҥнэһэллэр. Ол тэҥнэһэн баран төннөн кэлэн илин Амма үрэххэ кэлэн аара хоно сыттаҕына, утуйа сытар киһини илин дойду тоҥуһа батыһан кэлэн, уоран сулумах оҕунан биирдэ ытан өлөрөр. Онон Бэт Хара илин дойдуга тахсан тоҥус баатырын (хоһуунун) илиититтэн өлөн, уҥуоҕа илин Амма үрэҕэр хаалан турар диэн буолара...
Сэһэн Боло "Сүдү төрүттэрбит олохторуттан" Бичик. Дьокуускай 2002