Дадыал Бөҕө диэн Байаҕантай сиригэр үөскээбит күүстээх киһи. Кини улахана, күүһэ да бэт эбитэ үһү. Холобур хара тыаны (ойууру, сиһи) хайа хаамтаҕына, суола өт үрэх буолар гына тоҕо кэһэн, хайа солоон тахсан, сири-дойдуну киэбин хамнатар буолара үһү.
 

Дадыал Бөҕө ол курдук аатыра сылдьан күүһүн-уоҕун, дьолун-соргутун чинчилэтэн билээри оччоҕо онно олохтоох чинчиһит, таҥхаһыт, билгэһит (дьылҕаһыт) кырдьаҕас баарыгар тиийэн ыйытар: "Миигин үтүө улуу кырдьаҕаһым, чинчилээ, таҥхалаа. Мин күүһүм олус буолуон сөп, онон бу Бороҕон Бэт Хараны кытта баран күөн көссөн, хаан хассан үтүө үрдүк аатын ылан кэлэрбэр кыахтаах болууһукпун дуо? Бэт Хара соҕотоҕун сураҕырда, аҥаардастыы аатырда!" - диэн көрдөһө былаан туран. Онуоха Балта Баатыр чинчилээн, таҥхалаан этэр: "Ээ, тукаам, эн күүһүн хоппот, үөһээттэн оҥоруулаах, ситэ силгэлээх, толору күүстээх киһи. Бэт Хара баһын уҥуоҕа үс хос халыҥ ээ, оттон эн баһыҥ уҥуоҕа икки эрэ хос халыҥ эбит, онон эн кинини кытта тулуһарыҥ суох. ити санааны сананыма, барыма", - диэн олох буойбут. Онон Дадыал Бөҕө чинчиһит билгэтинэн, таҥхаһыт дьылҕатынан Бэт Хараҕа дьулайан барбатаҕа үһү.

Былыргы үйэҕэ ситэ оҥоруулаах, бүтүн күүстээх саха бухатыырдара чинчиһит, тнхаһыт, дьылҕаһыт киһиэхэ билгэлэтэн онно манна бараллара, күөн көрсөллөрө да үһү.

Сэһэн Боло "Сүдү төрүттэрбит олохторуттан" Бичик. Дьокуускай 2002.